Volonterler memlekettik satyp alý konkýrsynda baǵany 400 mln teńgege kóterýge jol bermedi

ATYRAÝ. KAZINFORM – Atyraý oblysynda sybaılas jemqorlyqqa qarsy monıtorıng júrgizetin 88 volonter bar. Olar memlekettik satyp alý konkýrsyndaǵy baǵany 400 mln teńgege kóterýdiń aldyn alǵan.  

Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtiń aıtýynsha, elimizde 2008 jyly BUU-nyń sybaılas jemqorlyqqa qarsy konventsııasy ratıfıkatsııalanǵan.

– Qazaqstanda konventsııa ratıfıkatsııalanǵannan beri ulttyq zańnamany halyqaralyq standarttarǵa sáıkestendirý boıynsha aýqymdy jumys atqaryldy. Sońǵy bes jylda sybaılas jemqorlyqqa qarsy ozyq novellalar belsendi túrde engizildi. Quqyqtyq aktilerdiń jemqorlyqqa qarsy saraptamasy qalpyna keltirildi. Sybaılas jemqorlyq úshin sottalǵandarǵa memlekettik qyzmette jáne kvazımemlekettik sektorda jumys isteýge ómir boıy tyıym salyndy. Sanktsııalar qatańdatyldy. Jemqorlyq týraly habarlar úshin syıaqy kólemi ósti. Eńbek quqyqtaryn qorǵaý boıynsha sharalar qabyldandy. Aqparatty jarııa etkeni úshin qylmystyq jaýapkershilik engizildi, - deıdi Erulan Serikqalıev.

Onyń pikirinshe, jemqorlyqqa qarsy kúreste jańa jáne tıimdi ıdeıalarmen almasý jolǵa qoıylǵan. Osy oraıda jemqorlyq problemasyn oń sheshý, oǵan qarsy kúresti jetildirý úshin jańa jobalar men tıimdi tásilder jetildiriledi.

– Sybaılas jemqorlyqqa qarsy kúrestegi tıimdi tájirıbeniń biri – volonterlerdi tartý. Qazir Atyraý oblysynda belsendi sybaılas jemqorlyq táýekelin anyqtaýǵa úles qosyp júrgen belsendi volonterlerdiń sany 88 adamǵa jetti. Olar memlekettik satyp alý konkýrsyna usynylǵan baǵany kóterýdi jıi anyqtaıdy. Máselen, bıyl konkýrs baǵasyn 400 mln teńgege kóterý táýekeliniń aldyn akdy, - dep málim etti Erulan Serikqalıev.

Eske sala ketelik, budan buryn Atyraý oblysynda 30 jattyqtyrýshy jalǵan dıplommen jumys istep kelgenin jazǵan edik.