Volonterler medıtsına qyzmetkerlerine «Alǵys paketterin» berdi

NUR-SULTAN. QazAqparat – Koronavırýsqa qarsy kúres kezinde qazaqstandyq dárigerlerdi qoldaý aıasynda jasotandyqtar Nur-Sultan jáne Almaty qalalarynda «Alǵys paketterin» taratý aktsııasyn uıymdastyrdy.

Árbir osy pakette dárigerlerge arnalǵan vıtamınder men paıdaly qasıetteri bar ónimderdiń onnan astam túri salynǵan. Paketterge atalǵan ónimder dárigerlerdiń usynysy boıynsha salynǵanyn atap ótý kerek.

Volonterdiń aıtýynsha, bul aktsııa elimizdiń barlyq óńirlerinde jalǵasyn tabýda.

«Búgin biz, jasotandyqtar, bizdiń erjúrek dárigerlerimiz úshin aktsııa uıymdastyrdyq. Óıtkeni, olar búkil qoǵamdy ábigerge salǵan koronavırýs pandemııasymen kúndelikti kúresýde. Árbir pakette vıtamınder men mıneraldar bar paıdaly ónimder salynǵan. Sondaı-aq, bul aktsııany óńirlerde bizdiń eriktiler jalǵastyratyn bolady. Biz bul aýrýdy birlesip jeńemiz dep senemin», - Aıdarbek Baqdaýlet

«Jas Otan» JQ 100-den astam eriktisi birneshe apta boıy óz otbasylarynan oqshaýlaýǵa májbúr bolǵan orta býyn medıtsına qyzmetkerleri úshin «Alǵys paketterin» taratýdy uıymdastyrýdy josparlap otyr. Qazirgi ýaqytta Nur-sultan qalasynda koronavırýsqa qarsy kúreste 2,5 myńnan astam medıtsına qyzmetkeri, Almatyda 4 myń medıtsına qyzmetkeri jumys isteıdi.