Volonterler azamattyq sektordy belsendi damytýdyń bólshegine aınaldy – komıtet tóraǵasy

NUR-SULTAN. QazAqparat – Volonterler azamattyq sektordy belsendi damytýdyń bólshegine aınaldy. Mundaı pikirdi QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet bildirdi, dep habarlaıdy QazAqparat tilshisi.

«Bıyl Volonter jyly dep jarııalanǵan. Volenterler azamattyq sektordy belsendi damytýdyń bólshegine aınalǵany sózsiz. Osynaý kúrdeli kezeńde volonterler halyq aldyndaǵy aıryqsha azamattyq áleýmettik jaýapkershilikterin kórsete bildi. Bizdiń mınıstrliktiń paıymy mynadaı: Volonterlik tek qana kómek kórsetý emes, sonymen birge halyq úshin adamı jáne kóshbasshylyq sapany tanytý úshin baza da. Qazirgi jaǵdaıda jańa formattaǵy azamattyq qoǵam qalyptastyrý boıynsha tyń tásiler mańyzdy. Osylaısha, búginde volenterlerdiń qazvolunteer.kz biryńǵaı onlaın tuǵyrnamasy jumys istep tur. Tuǵyrnamada 30 myńnan astam erikti men 2 500 volenterlik uıym tirkelgen», - dedi ol «Damý tarıhy: ishteı kózqaras» atty 11-shi jyl saıynǵy halyqaralyq konferentsııasynda.

Onyń aıtýynsha, 200-den astam volonterlik uıymnyń basyn qosatyn Volonterlerdiń respýblıkalyq front-keńsesi jemisti jumys istep tur.

«Volonter jyly aıasynda volonterlik uıymdardy damytýǵa arnalǵan 40-tan astam júıeli shara josparlanǵan. Bıyl bilim berý, aǵa býynǵa qoldaý kórsetý, ekologııa, medıtsına, sektorlaryn damytýǵa baǵyttalǵan 7 jalpyulttyq joba júzege asyrylady. Úkimettik emes uıymdarmen odan ary da jumys isteý qajet. Biz azamattyq sektordyń ózekti áleýmettik bastamalaryn damytý máseleleri boıynsha yntymaqtastyqqa ashyqpyz jáne ózara dıalogqa daıynbyz», - dedi Madııar Qojahmet.