Volonterlarǵa úlken múmkindik berilip otyr – Musa Kóneev

ORAL. QazAqparat – Elimizde eriktilerge úlken múmkindik berilip otyr. Bul týraly «Oral» stýdentter alıansynyń kóshbasshysy, BQO «Aqjaıyq volonterleri» volonterlik korpýsynyń jetekshisi Musa Kóneev málim etti, dep habarlaıdy QazAqparat tilshisi.

Onyń aıtýynsha, Prezıdenttiń qatysýymen elordada «Birgemiz» atty volonterler front-ofısiniń ashylýy erekshe kún retinde este qalmaqshy.

-Volonterler jylynda biz ne isteýimiz kerek, neni basshylyqqa alýymyz qajet, bul qozǵalys aldaǵy ýaqytta qalaı damymaqshy, mine, Memleket basshysynyń sózinen osy saýaldarǵa jaýap aldyq, - deıdi M.Kóneev.

Volonterler osyǵan deıin óz qyzmetterin erikti túrde atqaryp kelse, endi bul jumys eńbek ótiline kirmekshi. Taǵy bir mańyzdy másele, volonter stýdentterge qosymsha stıpendııa beriletini. Árıne, bul – jastar úshin úlken jeńildik ári qoldaý.

«Oral» stýdentter alıansynyń basshysy retinde qazvolunteer.kz saıtynyń jumysyn jaqsartýǵa kúsh salmaqshymyz. Al «Aqjaıyq» volonterleri» barlyq baǵyt boıynsha óz isin shırata túsetin bolady. Bul rette aýdandardaǵy eriktilerdiń jumysyna basa kóńil bólmekshimiz. Qalamen qatar aýyldyq eldi mekenderdi de nazardan tys qaldyrýǵa bolmaıdy. Aýdandarda da suranys-talap jeterlik, sondyqtan ondaǵy eriktilerdiń basyn qosyp, jobalaryn talqylap, júzege asyrý múmkindikterin qarastyrý qajet», dedi Musa Kóneev.

Eske sala keteıik, budan buryn volonterlik qyzmet aıasy keńeıe túsetinin jazǵan bolatynbyz.