Volonter jyly: Qazaqstan ATMÓ elderin jańa bastamany qoldaýǵa shaqyrdy
Búgin Bangkok qalasynda (Taıland) VIII Azııa-Tynyq muhıty forýmy aıasynda «Volonterlik onjyldyqqa arnalǵan is-qımyldardy transformatsııalaý strategııasy retinde» taqyrybynda paneldik pikirtalas ótti.
Іs-sharaǵa onlaın-formatta ZOOM alańyn qosý arqyly Qazaqstannyń Aqparat jáne qoǵamdyq damý vıtse-mınıstri Bolat Tilepov qatysty.
Sóz sóıleý barysynda Bolat Tilepov volonterlerdiń elimizdiń qoǵamdyq ómirindegi róli jáne Qazaqstanda eriktiler qozǵalysyn damytý úshin jasalyp jatqan jaǵdaı týraly aıtyp berdi.
Osylaısha, ol Qazaqstanda «Volonter jyly» aıasynda ótken 2020 jyldyń ózinde volonterlik uıymdar men toptardyń sany 3 ese, turaqty volonterler sany 4 ese, olardyń sany 200 myńnan astam adam óskenin habarlady.
«Pandemııamen kúres kezeńinde eriktiler qozǵalysyna 1 mıllıonǵa jýyq qazaqstandyq qosylyp, 1,5 mıllıonnan astam azamattarymyzǵa kómek kórsetildi», — dedi ol. Sonymen qatar, Bolat Tilepov Qazaqstannyń halyqaralyq volonterlikti damytý boıynsha jumys júrgizip jatqanyn erekshe atap ótti.
Yntalandyrý sharalarynyń biri - Qazaqstandaǵy Volonter jyly aıasynda qurylǵan «Jyl eriktisi» halyqaralyq syılyǵy.
Ótken jyly ony Qazaqstan, Reseı, Qyrǵyzstannan kelgen 48 belsendi volonter aldy. Budan basqa, búginde BUU júıesinde Qazaqstannan 71 volonter qyzmet etedi, onyń ishinde 42 áıel, onyń ishinde 7 volonter QR Aqparat jáne qoǵamdyq damý mınıstrligi men BǴDU arasyndaǵy áriptestik týraly kelisim sheńberinde BUU-nyń túrli agenttikterine jiberilgen.
Bolat Tilepov Qazaqstan BUU BA qararynyń mátinine volonterlikti 2030 jylǵa deıingi kezeńge arnalǵan turaqty damý salasyndaǵy kún tártibin iske asyrýdyń ámbebap quraly dep taný týraly tarmaqty engizýge bastama jasaǵanyn eske saldy.
Esterińizge sala keteıik, bul qarar BUU-ǵa múshe elderden qoldaý taýyp, 2020 jyldyń jeltoqsanynda qabyldanǵan bolatyn.
«Ótken jyly Qazaqstan Prezıdenti Q.Toqaev BUU Bas Assambleıasynyń 75-shi sessııasynda eriktilerdi jumyldyrýdyń halyqaralyq jylyn jarııalaý týraly bastama kótergen bolatyn. Búgingi tańda BUU DB-men ony ilgeriletý, BUU-nyń tıisti qararyn daıyndaý boıynsha birlesken jumys júrgizilýde. Osyǵan baılanysty turaqty damý jónindegi Azııa – Tynyq muhıty forýmyna qatysýshy elderden Qazaqstannyń bastamasyn qoldaýdy jáne «ıgi ister« dúnıejúzilik ıdeıasyn iske asyrýdy suraımyz» dedi Bolat Tilepov.
