«Volonter», «Metsenat» qazaq uǵymynda burynnan bar – kásipker

NUR-SULTAN. QazAqparat – Aqtóbelik kásipker qaıyrymdylyq is jasaýdyń qazaq halqynyń qanynda baryn aıta kele, buqarany qaıyrymdylyqpen aınalysýǵa shaqyrdy, dep habarlaıdy QazAqparat tilshisi.

«Bizdiń qor 15 jyl boıy ártúrli salada qyzmet jasap keledi. Onyń negizin qurýshy Islambek Saljanov degen aqtóbelik azamat. Ózi aýyldyq jerden shyqqan. Óz aýylynda 150 oryndyq zamanaýı balabaqsha, sondaı-aq memleketpen birigip mýzeı salǵan. Odan da basqa qazirgi tańda 40-tan astam isti júzege asyryp jatyrmyz. Sonymen qatar bilim salasynyń damýyna da óz úlesimizdi qosyp jatyrmyz. Onyń ishinde aýyldyq balalardy UBT-ǵa jáne shetelge oqýǵa túsýge tegin daıyndap jatyrmyz. Aıtarym, kásipkerler de qoǵamnyń bir bólshegi, qolymyzdan kelgenshe kómektesemiz», - dedi «Altyn Qyran Foundation» qoǵamdyq qorynyń atqarýshy dırektory Maqsutbek Aıtmaǵambet.

Onyń aıtýynsha, qazaq tili, tarıh jáne tól mádenıetti qoldaý men damytýǵa arnalǵan sharalar óz jalǵasyn tabady.

«Bir qýantarlyǵy, Memleket basshysynyń bastamasymen jarııalanǵan volonter jylynyń odan ári jalǵasyp jatqany. Taǵy bir aıtyp ótetin dúnıe, bizge endi jetip jatqan «volonter», «metsenat» sózderi qazaq uǵymynda burynnan bar. Bizdiń tarıhymyzda halyq dalada qalmaǵan, túrme degen túsinik bolmaǵan. Bizdiń halyq árdaıym qaıyrymdy bolǵan. Jetim-jesirin dalaǵa tastamaǵan, bul bizdiń qanymyzda bar. Endi biz sony «Rýhanı jańǵyrý» baǵdarlamasy aıasynda qaıta zamanaýı túrde jańǵyrtýymyz kerek», - deıdi ol.

Aıta ketsek, elordada QR Aqparat jáne qoǵamdyq damý mınıstri Aıda Balaevanyń qatysýymen «Qaıyrymdylyq ister» marafony respýblıkalyq aktsııasynyń saltanatty ashylý rásimi ótip jatyr.