Volonter bolý oqýǵa túsýge nemese jumysqa ornalasýǵa kómektese me – depýtat jaýaby
ASTANA. KAZINFORM – Qazaqstanda joǵary oqý orynyna túsý jáne memlekettik qyzmetke ornalasý kezinde eriktilik (volonterlik) qyzmet esep alynýy kerek. Muny Májilis depýtaty Vera Kım BIZDIÑ ORTA podkastynda aıtty.
Depýtattyń sózinshe, eriktilik qyzmetti eńbek ótili retinde esepke alý máselesi jan-jaqty pysyqtaýy shart.
– Eriktilik qyzmettiń naqty jumys kestesi bolmaıdy: erikti jylyna birneshe saǵat nemese turaqty jumys isteýi múmkin. Sondyqtan ony eńbek ótilimen tikeleı teńestirý múmkin emes. Eriktilerdiń qoǵamǵa qosqan úlesin baǵalaý úshin arnaıy kórsetkish qajet. Eger bul faktor JOO-ǵa oqýǵa túsý kezende nemese jumysqa ornalasý kezinde yqpal etetin bolsa, onda mundaı ózgeris sheshýshi ról atqaratyny sózsiz, – dedi Vera Kım.
Sondaı-aq Vera Kım memlekettik qyzmetke qabyldaý kezinde volonterlik tájirıbeni eskerý keregin ashyp aıtty.
– Árıne, birinshi kezekte azamattyq jáne memlekettik qyzmet salalaryna basymdyq beriledi. Bul saladaǵylar – el úshin eńbek etip júrgen azamattar. Eriktiler de memleketiniń ıgiligi jolynda qyzmet atqarady. Sondyqtan, meniń oıymsha, eriktilik isi memlekettik qyzmetke ornalasý kezinde mindetti túrde eskerilýi tıis», – dedi depýtat.
Aıta keteıik, keıingi jyldary volonterlik salany tsıfrlandyrý máselesi jıi kóterilip júr. Bıyl qańtarda ótken Eriktiler forýmynda Prezıdent Qasym-Jomart Toqaev eriktiniń tsıfrlyq tólqujatyn engizý bastamasyn qoldady.
– El ómiriniń barlyq salasyna ozyq tehnologııa tásilderi, ásirese, jasandy ıntellekt júıesi engizile bastady. Eriktiler qozǵalysy da bul jumystan shet qalmaýy kerek. Men volonterdiń tsıfrlyq pasportyn jasaý týraly usynysty tolyq qoldaımyn, – dedi Memleket basshysy.
Buǵan deıin qazaqstandyqtardyń úshten ekisi qaıyrymdylyq sharalaryna atsalysatynyn jazdyq.
