Volonter bolǵanymnyń arqasynda áleýmettik kásipkerge aınaldym – Emın Askerov

NUR-SULTAN. QazAqparat - «BІRGEMІZ: BІLІM jobasynyń» mindeti – ár aımaqtaǵy oqýshylardy ІT salasyndaǵy bilimin jetildirýge, aǵylshyn tilin úıretýge kómektesý jáne UBT-ǵa daıyndaý. Bul týraly Ortalyq kommýnıkatsııalar qyzmetinde ótken onlaın brıfıngide GreenTAL əleýmettik sheberhanasynyń basshysy, áleýmettik kásipker Emın Askerov aıtty, dep habarlaıdy QazAqparat tilshisi.

«Meniń volonterlik qyzmetim 2012 jyly bastaldy. Ol kezde elordaǵa kóship kelgenmin jáne dosym da, tanysym da, jumysym da bolmaǵan kezder edi. Uzaq ýaqyt jumys izdedim. Keıin volonterlik jobany qolǵa aldym. Biz Aqmola oblysyndaǵy Balalar úıindegi balalardy qoǵamǵa beıimdeý jumystarymen aınalystyq. Olarǵa Balalar úıinen shyqqannan keıin ómirde kerek bolatyn mashyqqa úırettik. Men volonter bolý arqyly ózimdi taptym, maqsattas, armandas ortamdy taptym. Volonter bolýdyń arqasynda áleýmettik kásipkerge aınaldym. Volonterlik elimizde damı bastaǵanyna óte qýanyshtymyn», - deıdi GreenTAL əleýmettik sheberhanasynyń basshysy, áleýmettik kásipker Emın Askerov.

Emın Askerov elordaǵa kóship kelmes buryn AQSh-ta turǵan.

«AQSh-ta qoǵamda oryn alyp jatqan jaǵdaılarǵa patrıottyq túrde, janashyrlyqpen qaraıdy. Elge kelgen kezde bizdiń memlekette nege olaı emes degen suraqqa jaýap izdedim. Qazir osyǵan qatysty jaǵdaı jaqsy jaqqa ózgergen. Bıyl «BІRGEMІZ: BІLІM jobasynyń» ambassadory boldym. Mindetimiz – ár aımaqtaǵy oqýshylardy ІT salasyndaǵy bilimin jetildirýge, aǵylshyn tilin úıretýge kómektesý jáne UBT-ǵa daıyndaý. Joba 100% júzege asty. Atyraý oblysy kóshbasshy bolyp tur. Pandemııa bastalǵaly osy jobaǵa 1568 oqýshy, 135 volonter tartyldy», - deıdi ol.