Volkswagen Tesla-ny basyp ozyp, Eýropadaǵy elektromobılder satylymynyń kóshbasshysy boldy
ASTANA. KAZINFORM — Germanııanyń Volkswagen avtokontserni 2025 jyldyń qorytyndysy boıynsha elektromobılderdiń Eýropadaǵy eń iri satýshysy bolady, dep habarlaıdy DW.
JATO konsaltıngtik kompanııasynyń málimetinshe, byltyr kompanııa 274 278 elektr kóligin satty, bul 2024 jylǵy kórsetkishpen salystyrǵanda 56 paıyz artyq.
Satylymnyń ósýine negizinen avtokontsernniń jańa úlgileri, sonyń ishinde ortasha ólshemdi ID.7 elektromobıli áser etti. Bul Volkswagen-ge buryn eýropalyq elektromobılder naryǵynda jetekshi orynǵa ıe bolǵan amerıkalyq Tesla kompanııasyn basyp ozýǵa múmkindik berdi.
Tesla-nyń Eýropadaǵy 2025 jylǵy satylymy týraly naqty derekter joq, biraq JATO málimetteri boıynsha ol 27% qysqarǵan.
Sarapshylar buǵan sebep retinde Ilon Mask kompanııasynyń Germanııadaǵy bedeliniń nasharlaýyn, sondaı-aq Eýropada eskirgen úlgilerdi satýǵa shyǵarǵanyn ataıdy.
Degenmen, byltyr Tesla-nyń Model Y Eýropadaǵy eń kóp satylatyn elektromobıl mártebesin saqtap qaldy. Ekinshi oryn Volkswagen Group brendi Skoda-nyń Elroq elektr krossoverine buıyrdy.
Eske sala keteıik, 2025 jyly álem boıynsha elektromobıl satylymy aldyńǵy jylmen salystyrǵanda 20 paıyzǵa ósip, rekordtyq 20,7 mln danaǵa jetti.
