Volkswagen taǵy 12 myń jumys ornyn qysqartýdy josparlap otyr
ASTANA. KAZINFORM – Germanııanyń Volkswagen avtokontserni 2030 jylǵa deıin negizgi brendi boıynsha taǵy 12 myń jumys ornyn qysqartýdy josparlap otyr. Bul buryn jarııalanǵan 35 myńnan astam jumys ornyn qysqartý josparyna qosymsha bolmaq, dep habarlaıdy Bild basylymy.
Kompanııa qyzmetkerlerdi qysqartýdy áleýmettik turǵydan barynsha qolaıly jolmen júzege asyrýdy kózdeıdi. Sonymen qatar jumysshylarǵa memleket qoldaý kórsetetin arnaıy jumyspen qamtý qurylymdaryna aýysý múmkindigin usynbaq. Alaıda IG Metall kásipodaǵy bul bastamaǵa úzildi-kesildi qarsy shyǵyp, jyl sońynan bastap eńbek daýyn kúsheıtýi múmkin ekenin eskertti.
Juma kúni ótken daǵdarys jónindegi kezdesýde taraptar ortaq kelisimge kele almady. Volkswagen qarjylyq jaǵdaıdyń qıyndaýyna baılanysty eńbek shyǵyndaryn tez arada qysqartý qajettigin alǵa tartty. Al kásipodaq basshylyqty jumys oryndary men óndiris oryndaryn saqtap qalý jónindegi ýádesin oryndaýdyń ornyna, qysqartýlardy odan ári kóbeıtpek dep aıyptady.
Volkswagen kompanııasynyń kadr máselelerine jaýapty basqarma múshesi Arne Maısvınkel ekonomıkalyq jaǵdaıdyń nasharlaýyn jospardyń basty sebebi retinde atady.
– Ýaqyt joǵaltýǵa bolmaıdy. 2024 jyly bolashaqqa qatysty jasalǵan ujymdyq kelisimnen beri ekonomıkalyq jaǵdaı kúrt nasharlady, – dedi ol.
Onyń aıtýynsha, bul shuǵyl shara qabyldaýdy talap etedi.
Kompanııa 2030 jyldyń sońyna deıin jumyspen qamtýdy qamtamasyz etý týraly mindettemesin saqtaıtynyn málimdedi.
Kásipodaq jumys berýshiniń josparyna qarsy
Qyzmetkerlerdi arnaıy jumyspen qamtý qurylymdaryna aýystyrý týraly usynys jańa kelispeýshilik týǵyzdy. IG Metall kásipodaǵy muny ujymdyq kelisim talaptaryn buzý ári jetkilikti quqyqtyq negizi joq bastama dep baǵalady. Kásipodaq mundaı sharalar shyǵyndy salyq tóleýshilerdiń esebinen óteýge ákelýi múmkin dep qaýiptenedi.
Qyrkúıek aıynyń sońynda Volkswagen 10 ujymdyq kelisimdi 2026 jylǵy 31 jeltoqsannan bastap toqtatatynyn habarlaǵan edi. Bul kelisimder jumys ýaqyty, eńbek demalysy jáne qosymsha tólemder sııaqty máselelerdi retteıdi. Ózgerister Germanııadaǵy shamamen 130 myń qyzmetkerge áser etedi.
Kásipodaq muny jumys berýshige degen senimge nuqsan keltiretin sheshim dep sanaıdy.
Kásiporynnyń jumys keńesiniń tóraıymy Danıela Kavallo kompanııanyń bul áreketin «asa úlken qorlaý» dep ataǵan. Al IG Metall kásipodaǵynyń óńirlik jetekshisi Torsten Greger jaǵdaıdyń buryn-sońdy bolmaǵan aýqymdaǵy eńbek daýyna ulasýy múmkin ekenin eskertti.
Taraptar arasyndaǵy ujymdyq kelissózder 2026 jylǵy 24 qarashada Emden qalasynda bastalyp, 15 jeltoqsanda Tsvıkkaýda jalǵasady. Kelissózderge baılanysty eńbek daýyn toqtatý mindettemesiniń merzimi 31 jeltoqsanda aıaqtalady. Osy ýaqytqa deıin kelisimge qol jetkizilmese, eskertý ereýilderi men basqa da eńbek narazylyqtary bastalýy múmkin.
Eske sala keteıik, Volkswagen qysqartýlarǵa baılanysty SEAT markasynan bas tartýy múmkin ekenin jazǵanbyz.
Al jaqynda Volkswagen-niń álem boıynsha 100 myń jumys ornyn qysqartqaly jatqany belgili boldy.
