Volkswagen tabysy tómendep, shyǵyndardy qysqartý sharalaryn kúsheıtpek
ASTANA. KAZINFORM — Germanııanyń iri avtokontserni Volkswagen kúrdeli kezeńge tap bolǵanyn jáne qosymsha shyǵyndardy qysqartpasa, kompanııanyń bolashaǵyna qaýip tónetinin eskertti, dep habarlaıdy Euronews.
2026 jyldyń qańtar–naýryz aralyǵynda kontsernniń taza paıdasy 28%-ǵa tómendep, 1,56 mlrd eýrony qurady. Al kiris 2%-ǵa azaıyp, 75,7 mlrd eýro boldy. Bul kórsetkishter sarapshylar boljamynan da tómen shyqty.
Kompanııanyń qarjy dırektory Arno Antlıtstiń aıtýynsha, qazirgi shyǵyndardy qysqartý sharalary jetkiliksiz.
— Bizge bıznes-modeldi túbegeıli ózgertý qajet. Barlyq baǵytta qurylymdyq ári turaqty tıimdilikke qol jetkizýimiz kerek. Áıtpese, kompanııanyń bolashaǵy qaýip-qaterge ushyraıdy, — dedi ol.
Jańa baǵdarlama óndiris shyǵyndaryn azaıtý, ákimshilik shyǵystardy qysqartý jáne zaýyttardyń tıimdiligin arttyrýdy kózdeıdi. Sondaı-aq sheshim qabyldaý men tehnologııalyq ázirlemelerdi jedeldetý josparlanǵan.
Volkswagen buǵan deıin Germanııadaǵy barlyq brendteri boıynsha 2030 jylǵa deıin 50 myń jumys ornyn qysqartý josparyn jarııalaǵan bolatyn.
Kompanııa quramyna Audi, SEAT, Škoda sııaqty 10 brend kiredi. Endi kontsern óndiristik qýatty qaıta qarap, shyǵyndardy ońtaılandyrýdy jalǵastyrmaq.
Kompanııa ókili Qytaı avtonaryǵyndaǵy básekelestiktiń kúsheıip kele jatqanyn atap ótti. BYD sııaqty qytaılyq óndirýshiler tek ishki naryqta ǵana emes, Eýropada da Volkswagen úshin mańyzdy básekeleske aınalǵan.
Qytaıdaǵy satylymdar artta qalyp otyr
Antlıts sonymen qatar bir jyl buryn AQSh prezıdenti Donald Tramp engizgen tarıfter kontsernniń shyǵyndaryn jyl saıyn qosymsha 4 mlrd eýroǵa arttyryp otyrǵanyn aıtty.
Birinshi toqsanda Volkswagen 2 mln avtokólik satty, bul ótken jylmen salystyrǵanda shamamen 7%-ǵa az. Ońtústik Amerıkada (+3%), Batys Eýropada (+1%) jáne Ortalyq jáne Shyǵys Eýropada (+7%) ósim baıqalǵanymen, Qytaıdaǵy (-20%) jáne Soltústik Amerıkadaǵy (-9%) tómendeý jalpy nátıjege keri áser etti.
Kontsern 2026 jyly jalpy satylym kólemi 0–3% aralyǵynda ósedi dep kútedi, al operatsııalyq rentabeldilik 4–5,5% deńgeıinde bolady dep boljanyp otyr.
Taıaý Shyǵystaǵy soǵystyń yqtımal saldary bul boljamdarǵa engizilmegen, sebebi olardy senimdi baǵalaý múmkin emes, dep habarlady Volkswagen.
Eýropanyń iri ekonomıkasyndaǵy, ásirese dástúrli ónerkásiptik óndirýshiler arasyndaǵy daǵdarys Volkswagen kompanııasynyń qıyndyqtarynan kórinis taýyp otyr.
Kompanııanyń 2025 jylǵy jyldyq paıdasy sońǵy on jyldaǵy eń tómen deńgeıge túsken.
Beısenbi kúni bas dırektor Olıver Blıýme Volkswagen strategııasyn «túbegeıli ózgerister kezeńin bastan keshirip jatqan jańa álemge» sáıkestendirý qajet ekenin aıtty.
Esep jarııalanǵannan keıin kompanııa aktsııalary Eýropa naryǵynda tańerteń azdap qymbattady.
Budan buryn aqpan aıynda Volkswagen Tesla-ny basyp ozyp, Eýropadaǵy elektromobılder satylymynyń kóshbasshysy bolǵanyn jazdyq.
