Volkswagen kún elektr stantsııasyna bir otar qoıdy «jumysqa aldy»
ASTANA. KAZINFORM – Volkswagen kompanııasynyń Poznan qalasyndaǵy Vjesnıa zaýyty kún elektr stantsııasyndaǵy shópti shabý úshin 100 qoıdy «jumysqa qabyldady». Osylaısha kásiporyn dástúrli shóp shabatyn tehnıkanyń ornyna tabıǵı ádisti qoldanýǵa kóshti, dep habarlaıdy Euronews.
Uly Polsha tuqymyna jatatyn júzge jýyq qoı Volkswagen Poznań kompanııasynyń Vjesnıadaǵy kún elektr stantsııasynyń aýmaǵynda jaıylyp júr. Olar kún panelderiniń astyndaǵy shópti jep, aýmaqty kútip ustaýǵa kómektesedi.
Bul joba aýmaqty ekologııalyq jolmen kútip ustaýdan bólek, Polshadaǵy agrovoltaıka salasyndaǵy eń qyzyqty bastamalardyń biri ári ǵylymı zertteý alańy sanalady.
– Búginde bizdiń kún elektr stantsııamyz tek energııa óndirip qana qoımaıdy. Bul – bıoalýantúrlilikti, jergilikti aýyl sharýashylyǵyn jáne ǵylymdy qoldaıtyn oryn. Biz ónerkásiptiń tabıǵatpen úılesimdi jumys isteı alatynyn kórsetip otyrmyz, – dedi Volkswagen Poznań kásipornynyń dırektory Marjena Pıllıch-Gronska.
Myńdaǵan kún paneliniń astyndaǵy «shóp shabý» naýqany
Vjesnıadaǵy kún elektr stantsııasy – Eýropadaǵy osyndaı iri óndiristik nysandardyń biri. Shamamen 27 gektar aýmaqta jalpy qýaty 18,3 megavatt bolatyn 31 myńnan astam kún paneli ornatylǵan. Stantsııa kásiporynnyń energııa qajettiliginiń edáýir bóligin qamtamasyz etedi.
Mundaı úlken aýmaqty kútip ustaý úshin ósimdikterdi turaqty túrde shabý qajet. Osy maqsatta kásiporyn benzınmen nemese elektrmen jumys isteıtin shóp shabatyn tehnıkanyń ornyna Batys Eýropada keńinen qoldanylatyn qoı jaıý tásilin tańdaǵan.
Qoılar shóp pen aramshópti jep, kún panelderiniń qurylymyna zııan keltirmeıdi ári aýyr tehnıkany paıdalanýdy azaıtady.
Vınna-Gýradaǵy qoı fermasynyń ıesi ıÝstına Novak-Gaıektiń aıtýynsha, janýarlar jańa ortaǵa jaqsy beıimdelgen.
– Qoılar ózderin qaýipsiz sezinedi. Olar shaǵyn toptarǵa bólinip, stantsııa aýmaǵynyń ár bóliginde jaıylyp júredi. Bul olardyń jańa ortaǵa tolyq úırengeniniń belgisi, óıtkeni qaýip sezingen otar árdaıym bir jerge toptasady, – dedi ol.
Jobaǵa ǵalymdar da qyzyǵýshylyq tanytyp otyr
Qoılardy paıdalaný ekologııalyq turǵydan da tıimdi. Tabıǵı jaıylym shóp shabatyn tehnıkanyń shyǵaryndylary men shýyn azaıtyp, aýmaqtaǵy bıoalýantúrlilikti saqtaýǵa yqpal etedi.
Sonymen qatar bul tásil janýarlardyń ózine de qolaıly. Kún panelderi ystyqta kóleńke berip, úıezdeýine jaǵdaı jasap, qolaısyz aýa raıynan ishinara qorǵaıdy. Sonyń arqasynda qoılar keń aýmaqta erkin jaıylyp, tabıǵı azyqpen turaqty qorektene alady.
Vjesnıadaǵy joba tek aýmaqty kútip ustaýmen shektelmeıdi. Oǵan Poznan jaratylystaný ýnıversıtetiniń ǵalymdary da qatysyp, agrovoltaıkanyń janýarlardyń ál-aýqatyna, ósimdik jamylǵysyna jáne jalpy ekojúıeniń jumysyna áserin zerttep jatyr.
Eske sala ketsek, Volkswagen tabysy tómendep, shyǵyndardy qysqartý sharalaryn kúsheıtkeli jatqanyn jazdyq.
