Volkswagen kompanııasynyń menedjeri 7 jylǵa sottalýy múmkin
ASTANA. QazAqparat - Volkswagen kompanııasynyń menedjeri Olıver Shmıdt dızeldi daý boıynsha Detroıt sotynda ózin kinálimin dep moıyndady, dep habarlaıdy 24.kz.
Sondyqtan kontsernniń normatıvtik talaptaryn saqtaý jónindegi bólimniń burynǵy basshysy 7 jylǵa sottalyp, 40 myń dollardan astam aıyppul tóleýi múmkin. Óıtkeni tergeýshiler oǵan alaıaqtyq jasady degen aıyp taǵyp otyr. Biraq bul bastapqyda qarastyrylǵan jazadan áldeqaıda jeńil.
Sot úkimi jeltoqsan aıynda shyǵady. Al is kontsernniń dızeldi kólikterge aýaǵa shyǵarylatyn ýly qaldyqtardy azaıtyp kórsetetin baǵdarlamalyq qurylǵy ornatqanyna qatysty qozǵalǵan.
AQSh bıligi: «2009-2015 jyldary naryqqa shyǵarylǵan Volkswagen jáne Audi markaly 500 myńǵa jýyq jeńil kólikti kompanııa keri qaıtaryp alýy tıis», - deıdi. Al bul birlestikti 25 mlrd dollar shyǵynǵa batyrady.
