Volkswagen kompanııasynyń basyna qara bult úıirildi
ASTANA. QazAqparat - Volkswagen kompanııasyna qatysty taǵy da shý shyqty. Ońtústik Koreıa bıligi nemis kontsernin 14 mıllıon eýrodan astam aıyppul tóleýge mindettedi.
Kompanııa aýaǵa taralatyn zııandy qaldyqtar men tehnıkadan shyǵatyn dybys deńgeıi týraly jalǵan málimet bergen, dep habarlaıdy 24.kz. Sondaı-aq Volkswagen el aýmaǵynan 83 myń jeńil kólikti keri qaıtaryp alýy tıis. Sonymen qatar Ońtústik Koreıa ótken aptada Volkswagen, Audi jáne Bentley kólikterin satýdy toqtatty. Óıtkeni 80 úlgini saýdalaýǵa berilgen kýálikterdiń kúshi joıylǵan. Germanııalyq aqparat quraldarynyń jazýynsha, bul - kompanııaǵa qatysty sońǵy kezde qabyldanǵan eń aýyr sharalar. Aıta keteıik, keri qaıtarylǵan kólikter sany men mıllıondaǵan aıyppulǵa qaramastan, Volkswagen álemdegi kólik óndiretin eń iri kásiporyn retinde qalyp otyr. Alǵashqy jartyjyldyqta kontsern 5 mıllıon 200 myń kólik shyǵarǵan.
«Búgin kún jaqsy bastalmady. DAX nemis bırjalyq ındeksi qysyltaıań jaǵdaıǵa tap boldy. Buǵan Volkswagen-ge qarsy qabyldanǵan sharalar sebep bolýda. Búgin eki jamanat habar aldyq. Birinshisi - Ońtústik Koreıada satylymǵa tyıym salyndy. Ekinshisi - AQSh-ta ujymdyq aryz berý týraly úlken qaýip týyndady. Volkswagen Amerıkanyń saýda-sattyq zańnamasyn buzǵany týraly sot bolǵaly tur. Bul Volkswagen aktsıonerleri úshin naǵyz bas aýrýyna aınaldy. Munyń sońy iri problemaǵa ulasýy múmkin,-deıdi naryq sarapshysy Olıver Rot.
