Volkswagen Qytaıdaǵy zaýytyn jabady
ASTANA. KAZINFORM — Nemistiń Volkswagen avtokontserni Qytaıdyń Nankın qalasyndaǵy zaýytynda óndiristi toqtatyp, ony bıyl resmı túrde jabýdy josparlap otyr, dep habarlaıdy Kazinform agenttiginiń menshikti tilshisi.
Bul — Volkswagen men Qytaıdyń SAIC avtokompanııasynyń birlesken jobasy. Zaýyt 2008 jyly ashylǵan, al onyń jyldyq óndiristik qýaty 360 myń kólikke deıin jetken. Sońǵy ýaqytta bul zaýyt tek Passat jáne Skoda Superb modelderin shyǵaryp, qýattylyǵyn tómendetip jumys istep kelgen.
Zaýytty jabýdyń resmı sebebi — logıstıkalyq qıyndyqtar. Óndiris orny qalanyń ortalyǵyna jaqyn ornalasqan ónerkásiptik aımaqta bolǵandyqtan, ony qaıta jańǵyrtý tym qymbatqa túsedi.
Endi zaýyttyń aýmaǵy qalalyq ákimdik menshigine qaıtarylady, al óndiris kórshiles ornalasqan Ichjen qalasyndaǵy zaýytqa kóshiriledi. Aıta keteıik, avtokontsern osyndaı qadamdy 2022 jyly Shanhaı mańyndaǵy zaýytynda da jasaǵan bolatyn, biraq ol kezde óndiris tolyǵymen toqtatylǵan joq.
Osylaısha, Qytaıdaǵy jahandyq avtotóńiregindegi kompanııalar túrli qıyndyqtarǵa tap bolyp otyr. Bul rette Qytaı Volkswagen úshin mańyzdy naryqtardyń biri sanalady, sebebi kompanııanyń álemdik jetkizilimderiniń shamamen 30%-y osy elge tıesili.
Volkswagen ókili (Reuters agenttigi arqyly) «Nankındegi SVW zaýyty óndiristi toqtatty» jáne ol bıylǵy jyldyń ekinshi jartysynda jabylady dep rastady.
Ókildiń aıtýynsha, SAIC VOLKSWAGEN-niń kóptegen óndiristik alań qazirgi ýaqytta elektr kólikterin shyǵarý úshin qaıta jabdyqtalýda nemese qaıta jabdyqtalyp qoıǵan.
2025 jyldyń birinshi jartysynda SAIC Volkswagen 523 myń avtokólik satqan, bul ótken jylmen salystyrǵanda 2,3%-ǵa artyq. Qazir kompanııa jańa elektr kólikterin, onyń ishinde ID.4X Smart Edition, 2025 ID.3 Smart Edition jáne ID.3 GTX úlgilerin shyǵaryp jatyr.
Jyl sońyna qaraı SAIC VW jańa jetildirilgen tsıfrlyq platforma negizindegi alǵashqy elektr kóligi — Audi E5 Sportback modelin tanystyrmaq. Bul kólik tolyq qýatpen 770 shaqyrymǵa deıin júre alady.
Elektromobılderge kóshý úrdisine qaramastan, brend «janarmaı men elektr energııasyn qatar damytý» saıasatyn jalǵastyratynyn málimdedi. Kompanııa Passat, Lavida, Tiguan jáne T-Roc sekildi benzınmen júretin kólikterdi shyǵarýdy toqtatpaıdy.
Volkswagen kompanııasy 2026 jyldy «jańa energetıkalyq kólikter (NEV) men ıntellektýaldy kólik quraldaryn» shyǵarýǵa arnalǵan erekshe jyl dep jarııalady. 2030 jylǵa qaraı SAIC Volkswagen 20-dan astam jańa kólik túrin, sonyń ishinde jol talǵamaıtyn elektr kólikteri (EV) men qosarlanǵan gıbrıdterdi (PHEV) shyǵarýdy josparlap otyr.
Aıta ketelik jyl aıaǵyna deıin Astanadaǵy kólik aǵynyn JI arqyly retteıtin júıe ázirlenedi.