Volkswagen qysqartýlarǵa baılanysty SEAT markasynan bas tartýy múmkin
ASTANA. KAZINFORM – Volkswagen kontserniniń qaıta qurylymdaý josparyna baılanysty ıspandyq SEAT avtokólik markasynyń óndirisi 2029 jylǵa qaraı toqtatylýy múmkin. Bul týraly Confidencial basylymy kontsern basshylyǵyna jaqyn derekkózderge silteme jasap habarlady, dep jazdy DW.
Ispanııa úkimeti SEAT-ty saqtap qalýǵa kúsh salatynyn málimdedi. Birinshi vıtse-premer Karlos Kýerpo markany kezinde eldiń damýy men ál-aýqatynyń sımvolyna aınalǵan brend dep atady.
Sarapshylardyń pikirinshe, Volkswagen-niń qaıta qurylymdaýyna álemdik avtonaryqtaǵy básekeniń kúsheıýi, shyǵyndardy azaıtý, jańa tehnologııalarǵa ınvestıtsııa salý jáne bolashaǵy tómen modelderden bas tartý qajettigi sebep bolǵan.
Ispanııada Volkswagen úshin Cupra markasy anaǵurlym perspektıvaly sanalady. 2018 jyly paıda bolǵan Cupra qazirdiń ózinde álemdik naryqta tanymal bola bastaǵan, al 1950 jyldan beri shyǵarylatyn SEAT kólikteri negizinen Ispanııanyń ózinde suranysqa ıe.
Cupra ıspandyq Volkswagen bólimshesiniń negizgi tabysyn qamtamasyz etedi. Kompanııanyń elde eki zaýyty bar. Katalonııadaǵy kásiporynda 15 myń adam jumys isteıdi, bul Ispanııadaǵy eń iri ónerkásip oryndarynyń biri. Pamplonadaǵy zaýytta 4 870 qyzmetker bar.
Sarapshy Karlos Garsııa Ramostyń aıtýynsha, qaıta qurylymdaý negizinen shyǵarylatyn modelder sanyna áser etedi, sondyqtan jumys oryndary saqtalýy múmkin.
Alaıda Volkswagen-niń jospary týraly aqparat taraǵannan keıin SEAT kólikteriniń satylymy tómendeı bastaǵan. Ispanııa bıliginiń markany saqtap qalýǵa umtylysy oń baǵalanǵanymen, sarapshylar nemis kontserniniń sheshimine Madrıdtiń yqpaly shekteýli ekenin atap ótti.
Eske sala ketsek, buǵan deıin Volkswagen Germanııadaǵy tórt zaýytyn kezeń-kezeńimen jabýdy kózdep otyrǵanyn jazdyq.
Sondaı-aq Volkswagen kún elektr stantsııasyna bir otar qoıdy «jumysqa aldy».
Al jaqynda Volkswagen-niń álem boıynsha 100 myń jumys ornyn qysqartqaly jatqany belgili boldy.
