Volkswagen Germanııadaǵy tórt zaýytyn kezeń-kezeńimen jabatyn boldy
ASTANA. KAZINFORM – Germanııanyń Volkswagen avtokontserni qatań únemdeý sharalary aıasynda eldegi tórt zaýytta óndiristi toqtatý týraly sheshim qabyldady, dep habarlaıdy WirtschaftsWoche jýrnaly.
Basylymnyń málimetinshe, Emden men Tsvıkkaýdaǵy avtomobıl óndirisi 2031 jyly, Gannoverde – 2032 jyly, al Nekkarzýlmde – 2034 jyly toqtatylýy tıis.
WirtschaftsWoche qolyna túsken «2026 jylǵy 3-4 qyrkúıektegi baqylaý keńesiniń tujyrymdamalyq sheshimi týraly esep» osy aptanyń sońynda baqylaýshy organ qabyldaıtyn túpkilikti sheshimge negiz bolmaq. Qujatta Volkswagen tap bolǵan kúrdeli jaǵdaı sıpattalǵan.
– Qoldanystaǵy bıznes-modelder men qurylymdar Volkswagen kontserniniń uzaqmerzimdi básekege qabilettiligi men tabystylyǵyn qamtamasyz etý úshin endi jetkiliksiz, – delingen qujatta.
Sondaı-aq Volkswagen AG reıtıngin jáne kapıtal tartý men qaıta qarjylandyrýǵa baılanysty shyǵyndardy turaqtandyrý qajettigi aıtylǵan. Osyǵan baılanysty kontsern basqarmasy baqylaý keńesine aýqymdy ári túbegeıli qaıta qurylymdaý josparyn bekitýdi usynbaq.
Óndiristi shyǵyny tómen Chehııa, Slovakııa jáne Polshadaǵy kásiporyndarǵa kóshirý josparlanyp otyr.
Basylym málimetinshe, Germanııadaǵy zaýyttar 2027 jyldyń jazyna deıin bir avtomobıl óndirýge ketetin shyǵyndy qazirgi 6490 eýrodan Eýropadaǵy ortasha 2832 eýroǵa deıin tómendete alsa, jabylmaýy múmkin. Alaıda sarapshylar mundaı kórsetkishke qol jetkizýdi shyndyqqa janaspaıdy dep esepteıdi.
Buǵan deıin Volkswagen basshysy Olıver Blıýme qatań únemdeý sharalary aıasynda kontsern basshylyq qyzmetterdiń tórtten birin qysqartýdy josparlap otyrǵanyn málimdegen. Kóktemde ol jańa strategııa ázirlenip jatqanyn jáne shyǵyndardy azaıtý saıasaty aıtarlyqtaı kúsheıtiletinin aıtqan.
Sodan beri ondaǵan myń jumys orny men tórt zaýyttyń bolashaǵy talqylanyp keledi. Blıýme buǵan deıin aıtylǵan 50 myń qyzmetkerdi qysqartý kórsetkishin «maqsat» emes, shyǵyndardy ońtaılandyrýdan týyndaıtyn «teorııalyq eseptik kórsetkish» dep atady. Onyń shamamen jartysy Germanııaǵa, qalǵany kontsernniń álemdegi 170-ke jýyq bólimshesine tıesili bolýy múmkin.
25 tamyzda Bild basylymy Volfsbýrgtegi kontsernniń bas zaýytynda ótken óndiristik jıynda qyzmetkerler Olıver Blıýmeni ysqyryp qarsy alǵanyn habarlady. Keıbir jumysshylar kontsern basshylyǵyna narazylyǵyn bildiretin plakattar ustap shyqqan.
Aıta keteıik, buǵan deıin Volkswagen basshysy álem boıynsha 50 myńǵa deıin jumys orny qysqartylatynyn málimdegen edi.
Al onyń aldynda Volkswagen kún elektr stantsııasyna bir otar qoıdy «jumysqa alǵany» kópshilikti tańdandyrǵan-dy.
