Volkswagen dızeldik daý-damaıǵa qatysty AQSh-qa 4,3 mlrd dollar tóleıdi
ASTANA. QazAqparat - Avtomobıl shyǵarýshy Volkswagen «emıssııalyq daý-damaıdy» retteý úshin AQSh úkimetine 4,3 mlrd dollar tóleýge kelisimin berdi, dep habarlaıdy Bı-Bı-Sı agenttigi.
Sonymen qatar, nemis kompanııasy birqatar Amerıka zańdaryn buzǵanyna kináli ekendigin moıyndaıtyndyǵyn málim etti.
Volkswagen ókilderi Amerıkanyń Ádilet mınıstrligi jáne keden qyzmetimen beıbit kelisimge kelý jónindegi kelissózder aıaqtalýǵa jaqyn ekendigin habarlady.
Kompanııa ókilderiniń aıtýynsha, onda jalpy somasy 4,3 mlrd dollar qylmystyq jáne ákimshilik aıyppuldar qarastyrylǵan, sonymen qatar kompanııanyń kelesi úsh jyl qatarynan táýelsiz organ baqylaıdy.
4,3 mlrd dollarlyq aıyppuldar osy daý-damaıǵa qatysty kompanııa shyǵynyn 19,2 mlrd dollardan asyryp jiberedi.
Eske sala ketsek, bul daý 2015 jyldyń qyrkúıek aıynda shyqqan bolatyn. Amerıka úkimeti sol kezde Volkswagen kompanııasy ózi shyǵarǵan dızeldik avtomobılderdiń shyǵaryndy gazdarynyń derekterin jalǵan berip kelgen dep aıyptady.
Kompanııa málimetterine sensek, jasandy testileý nátıjesin berý álem boıynsha dızel dvıgateldi 11 mln mashınany qamtyǵan.
