Volkswagen dıspleı aqaýyna baılanysty 60 myńnan asa elektromobıldi qaıtaryp alady

ASTANA. KAZINFORM — Volkswagen kompanııasy AQSh-taǵy 60 490 elektromobıldi dıspleıindegi aqaýǵa baılanysty qaıtaryp alady, dep habarlaıdy Fox Business.

AQSh Ulttyq Jol qozǵalysy qaýipsizdigi basqarmasynyń (NHTSA) málimetinshe, zardap shekken kólikterge 2021-2023 jylǵy Volkswagen ID.4 úlgileri, sondaı-aq 2022-2023 Audi Q4 e-Tron jáne Q4 e-Tron Sportback kiredi.

Másele alǵash ret ótken jyldyń tamyz aıynda Amerıka Qurama Shtattarynan tys jerde bes jol-kólik oqıǵasy tirkelgennen keıin anyqtaldy.

Volkswagen kólik ıelerin habardar etip, máseleni sheshýge tyrysyp jatyr.

Nemis avtogıganty ótken aıda 30 000-ǵa jýyq kólikti keri qaıtaryp aldy, sebebi artqy kameralary durys jumys istemedi. Bul eń aldymen Audi Q3 jáne keıbir Volkswagen Tiguan jáne Arteon kólikterine qatysty.

Buǵan deıin Germanııadaǵy barlyq Volkswagen zaýyttary 2 jeltoqsannan bastap jumysyn toqtatatyny habarlandy.