Volkswagen-degi ereýil: kompanııa málimdeme jasady
ASTANA. KAZINFORM – Bıyl 2 jeltoqsanda Volkswagen jumysshylary eskertý ereýiline shyqty. Volkswagen-niń strategııa jáne qarjy salasyndaǵy kommýnıkatsııalar bóliminiń basshysy Krıstofer Haýss Kazinform agenttigine kompanııadaǵy ereýil men jalpy jaǵdaı jóninde, sondaı-aq Volkswagen AG talaptary týraly resmı málimdeme joldady.
Resmı málimdeme:
- Volkswagen qyzmetkerlerdiń eskertý ereýilderge qatysý quqyǵyna túsinistikpen qaraıdy. Kompanııa turaqty jáne birlesip qoldaý tapqan sheshimge qol jetkizý úshin syndarly dıalog ustanymyn saqtaýdy jalǵastyrady. Osy ereýildiń bizdiń klıentterge, seriktesterimizge jáne óndiris oryndaryna áserin barynsha azaıtýǵa tyrysamyz. Sondyqtan kompanııa shuǵyl jumystardy qamtamasyz etý úshin aldyn ala maqsatty sharalardy qabyldady. Kompanııa osy jaǵdaıǵa qatysty qosymsha aqparat beredi. Sonymen birge, biz ishki baılanys arnalaryn paıdalanyp, qyzmetkerlerge qazirgi jaǵdaı týraly egjeı-egjeıli málimet taratamyz, - delingen kompanııa málimdemesinde.
Volkswagen AG kontserniniń talaby:
Jumys oryndarynyń kepildigi
Volkswagen-niń jumys oryndaryna qatysty kepildigi 1994 jyldan bergi ujymdyq sharttyń bir bóligi sanalady. Ujymdyq shart pen «Tsıfrlyq transformatsııa jol kartasy» kelisiminiń toqtatylýy qazirgi ekonomıkalyq jáne qurylymdyq qıyndyqtarǵa baılanysty jasalyp otyr. Krıstofer Haýstyń aıtýynsha, bul óz kezeginde óndiris alańdary men jumys oryndarynda kepildikterdi qaıta qaraýǵa baǵyttalǵan.
Tarif Plus júıesin qoldaný
Tarif Plus sanatyn qoldaný naqty kásipti nemese basshylyq laýazymdardy atqaratyn qyzmetkerler úshin jeke ujymdyq shartpen [RTV T+] retteledi. Tarif Plus aıasynda qyzmetkerlerdiń jumys jaǵdaıy kompanııanyń standartty ujymdyq shartynda qarastyrylǵan talaptardan erekshelenedi. Bul rette jumys ýaqyty, bonýstar men qyzmettik avtokólikti paıdalaný tártibinde aıyrmashylyq bar.
2023 jyldyń sońynda kompanııa osy jalaqy sanatyndaǵy qyzmetkerler taǵaıyndalǵan kezde, tıisti talaptardyń turaqtalatynyn habarlady. Kelissózder barysynda kompanııa Tarif Plus aıasynda qyzmetkerlerge arnalǵan bonýs júıesin qaıta qurylymdaý josparyn usyndy. Bul turǵyda ony kiristi bólýdiń ujymdyq kelisilgen júıesine baılanystyrý maqsatynda jasaldy.
Dýaldy oqytý júıesindegi taǵylymdamadan ótetinder men stýdentterdi jumysqa ornalastyrý
Taǵylymdamadan ótetinderge arnalǵan ujymdyq kelisim boıynsha Volkswagen jyl saıyn 1400 oryn berý mindetin alǵan. Alaıda, buǵan deıin suranys az bolǵandyqtan, olardy jumysqa alýda qıyndyqtar jıi týyndaıtyn. Bul kelisimniń toqtatylýy taǵylymdamadan ótetinder men dýaldi oqytý júıesiniń stýdentterin jumysqa qabyldaý jáne bos qyzmet oryndary turǵysynda naqty suranysty úılestirýge baǵyttalǵan. Bul óz kezeginde qyzmetkerler men kompanııa úshin tıimdi josparlaýdy qamtamasyz etedi.
Eńbekaqy
Eýropadaǵy jáne sonyń ishinde Germanııadaǵy avtomobıl ónerkásibindegi qazirgi úrdisti eskere otyryp, kompanııa IG Metall talaptarynan bas tartýdan basqa mańyzdy is-sharalardy júzege asyrý qajet dep sanaıdy.
Volkswagen AG óz qyzmetkerleriniń jumys oryndaryn saqtaý mańyzdy ekenin aıtyp otyr. Ujymdyq kelissózder protsesi úshin Volkswagen AG-daǵy ujymdyq kelisimderinde qamtylǵan qyzmetkerlerdiń jalaqysyn 10 paıyzǵa tómendetý usynysy jasaldy. Bul qadam jappaı jumys oryndaryn qysqartýǵa jol bermeıdi.
Biryńǵaı eńbek jaǵdaılary bar standartty ujymdyq shart
Kompanııa básekege qabilettilikti qamtamasyz etý úshin 35 saǵattyq jumys aptasy jáne 2005 jylǵa deıin jumysqa qabyldanǵan qyzmetkerlerdi qorǵaý talabyn joıý sııaqty sharttarmen biryńǵaı ujymdyq kelisimdi engizý qajet dep sanaıdy (HTV I).
Kompanııa basshylyǵynyń paıymynsha, 2005 jylǵa deıin (HTV I) kompanııaǵa qosylǵan qyzmetkerlerdi qorǵaýdy alyp tastaıtyn 35 saǵattyq jumys aptasy bar birkelki eńbek jaǵdaılaryna arnalǵan standartty ujymdyq shart tıimdilikti arttyrýdyń taǵy bir elementi bolady.
Tıimdilikti kóterýdiń qosymsha qadamdary
Kompanııa uzaq merzimdi tabysqa jetýge kómektesetin taǵy bir tıimdilik is-sharasyn usynyp otyr. Bul turǵyda mereıtoılyq bonýstardy jáne aıyna 170 eýro kólemindegi ujymdyq kelisilgen bonýsty joıý kerek ekeni aıtylǵan.
🇩🇪✊ Over 10,000 Volkswagen workers in Germany strike against pay cuts and job security threats, demanding guarantees to keep factories open.
— upside down world (@upside_dow2032) December 2, 2024
🔗 Follow & share @globaldissident | 𝕏 GlobalDiss pic.twitter.com/IqVfYP2YQJ
Buǵan deıin Germanııanyń IG Metall kásipodaq uıymy Volkswagen avtokontserniniń qyzmetkerlerin 2 jeltoqsanda barlyq VW zaýyttarynda bastalatyn jalpyulttyq eskertý ereýiline shaqyrdy. Bul týraly jeksenbi, 1 jeltoqsanda Tómengi Saksonııa federaldy shtatyndaǵy IG Metall aımaqtyq keńsesiniń basshysy Torsten Greger (Thorsten Gröger) málimdedi.
VW basshylyǵy jumystan bosatý jáne jumysshylardyń jalaqysyn qysqartý josparlarynan bas tartpaǵandyqtan, kásipodaq kontsernniń zaýyttarynda ereýilder ótkizýge nıetti.
Jalaqy boıynsha IG Metall men Volkswagen arasyndaǵy kelissózder 9 jeltoqsanda jalǵasady dep josparlanǵan.
Eýropa men Germanııadaǵy eń iri avtokólik óndirýshi Volkswagen kompanııasynyń kirisi 64%-ǵa tómendedi.
Eske salsaq, Kazinform-nyń menshikti tilshisi Volkswagen daǵdarysy týraly taldaý materıal jasaǵan bolatyn.