Volkswagen basshysy álem boıynsha 50 myńǵa deıin jumys orny qysqartylatynyn málimdedi
ASTANA. KAZINFORM — Volkswagen Group kompanııasynyń bas atqarýshy dırektory Olıver Blıýme avtokontsern shyǵyndaryn azaıtýǵa baǵyttalǵan aýqymdy qaıta qurylymdaý aıasynda álem boıynsha qosymsha 50 myńǵa deıin jumys ornyn qysqartý qajet dep sanaıdy, dep habarlaıdy Deutsche Welle.
Kompanııanyń ishki jelisinde jarııalanǵan suhbatynda Blıýmeniń aıtýynsha, Volkswagen Group qyzmetkerleriniń sany básekelestermen salystyrǵanda shamamen 20%-ǵa kóp. Sondyqtan olarmen teń deńgeıge jetý úshin 2024 jyly iske qosylǵan shyǵyndardy qysqartý jospary aıasynda kózdelgen qysqartýlarǵa qosa taǵy shamamen 50 myń jumys ornyn qysqartý qajet bolýy múmkin.
— Kompanııadaǵy qyzmetkerler sany ondaǵan jyl boıy úzdiksiz ósip, búginde ekonomıkalyq turǵydan tıimsiz deńgeıge jetti, — dedi Olıver Blıýme.
Onyń aıtýynsha, mundaı sheshimge naryqtaǵy ózgerister men kompanııanyń baqylaýynan tys faktorlar sebep bolyp otyr. Bul faktorlardyń qarjylyq áseri ondaǵan mıllıard eýromen esepteledi.
Ótken aptada Volkswagen Group bıznesin damytý josparyn tanystyrdy. Qujatqa sáıkes, kompanııa shyǵarylatyn avtokólik modelderiniń qataryn shamamen 50%-ǵa qysqartýdy kózdep otyr.
Sonymen qatar avtokontsern óndiristik qýattardy qazirgi naryq talaptaryna jáne kúsheıip kele jatqan básekelestikke beıimdeý úshin ońtaılandyrýdy josparlap otyr. Atap aıtqanda, Volkswagen Qytaı men Eýropadaǵy óndiristik qýattaryn qysqartpaq.
Buǵan deıin Volkswagen kompanııasynyń Poznan qalasyndaǵy Vjesnıa zaýyty kún elektr stantsııasyndaǵy shópti shabý úshin 100 qoıdy «jumysqa qabyldaǵany» aıtyldy.
