Volkswagen álemdik deńgeıde 100 myń jumys ornyn qysqartpaq
ASTANA. KAZINFORM — Volkswagen kontserni búkil álem boıynsha shamamen 100 myń jumys ornyn qysqartýdy josparlap otyr. Bul kompanııa qyzmetkerleriniń jalpy sanynyń shamamen 15%-yn quraıdy, dep habarlaıdy Euronews.
Kompanııa basshylyǵy men kásipodaqtar buǵan deıin 50 myń jumys ornyn qysqartý týraly kelisse, endi taǵy 50 myń jumys ornyn qysqartý kózdelip otyr. Volkswagen málimdemesinde qyzmetkerler sanyn ekonomıkalyq jaǵdaıǵa sáıkestendirý mańyzdy ekeni aıtylǵan.
Eger jospar tolyq júzege assa, bul álemdik avtomobıl ónerkásibi tarıhyndaǵy eń aýqymdy qysqartýlardyń birine aınalýy múmkin. Buǵan deıingi iri mysaldardyń biri — General Motors kompanııasynyń 1991 jyly 74 myń qyzmetkerin qysqartýy. 2009 jyly amerıkalyq avtokontsern taǵy 47 myń jumys ornyn qysqartqan.
Volkswagen budan bólek, 2030 jyldan keıin Germanııadaǵy tórt iri zaýytyn jabý múmkindigin de qarastyryp otyr. Bul kontsernniń óz elindegi óndiristik qýattardy osyndaı aýqymda alǵash ret qysqartýy bolýy yqtımal.
Qaıta qurylymdaý baǵdarlamasyn dırektorlar keńesi men kásipodaqtardyń qoldaýy Volkswagen tap bolǵan ekonomıkalyq qıyndyqtardyń aýqymyn kórsetedi. Kompanııa bas dırektory Olıver Blıýme bul sheshim kontsernniń bolashaǵyna baǵyttalǵan mańyzdy belgi ekenin aıtty.
Volkswagen birneshe faktordyń qysymyna tap bolyp otyr. Olardyń qatarynda AQSh-tyń kedendik tarıfteri, elektromobılderge degen suranystyń turaqsyzdyǵy jáne qytaılyq avtokólik óndirýshileriniń básekesiniń kúsheıýi bar.
Volkswagen tobyna Volkswagen-men qatar Škoda, SEAT, Cupra, Audi, Bentley, Lamborghini, Ducati jáne Porsche brendteri kiredi.
Aıta ketelik Volkswagen Germanııadaǵy tórt zaýytyn kezeń-kezeńimen jabatyn boldy.
