Volkswagen álem boıynsha 50 myńǵa jýyq jumys ornyn qysqartpaq
ASTANA. KAZINFORM – Volkswagen kontserniniń baqylaý keńesi shyǵyndardy azaıtýdyń aýqymdy baǵdarlamasyn biraýyzdan maquldap, aldaǵy jyldary álem boıynsha taǵy 50 myńǵa jýyq jumys ornyn qysqartýdy josparlap otyr, dep habarlaıdy Deutsche Welle.
Kompanııanyń málimdeýinshe, qyzmetkerler sanyn azaıtý kontserndi transformatsııalaý baǵdarlamasynyń maqsattaryna qol jetkizý jáne onyń básekege qabilettiligin arttyrý úshin qajet.
Sonymen qatar Volkswagen-niń Germanııadaǵy Emden, Tsvıkkaý, Gannover jáne Nekkarzýlm qalalaryndaǵy tórt zaýytynyń bolashaǵy belgisiz bolyp otyr. Kompanııa bul kásiporyndardyń 2030 jyldan keıin óndiristik tapsyrystarmen qamtamasyz etiletinine ázirge kepildik joq ekenin málimdedi.
– «Bolashaq jospary» Volkswagen kontserni men onyń brendterin tıimdirek ári básekege qabiletti etip, uzaq merzimdi damýǵa baǵyttaýy tıis. Baǵdarlamany júzege asyrý kompanııanyń bolashaqtaǵy pozıtsııasyn saqtaý úshin qajetti shart sanalady, – delingen kontsern málimdemesinde.
Volkswagen atalǵan tórt kásiporyndy paıdalanýdyń balama nusqalaryn da qarastyryp jatyr.
Kontsern 2027 jyldyń maýsymyna deıin Eýropadaǵy zaýyttary úshin turaqty ári básekege qabiletti jańa óndiristik qurylym ázirleýdi josparlap otyr.
Kompanııa basshylyǵy men baqylaý keńesi shyǵyndardy qysqartý jáne óndiris qurylymyn ózgertý Volkswagen-niń uzaq merzimdi básekege qabilettiligin qamtamasyz etýge múmkindik beredi dep esepteıdi.
Aıta keteıik, Volkswagen Germanııadaǵy tórt zaýytyn kezeń-kezeńimen jabatyn boldy.
