Volkswagen 88 jyldyq tarıhynda alǵash ret Germanııadaǵy zaýytyn jabady

ASTANA. KAZINFORM — Germanııanyń iri avtomobıl kontserni Volkswagen óziniń 88 jyldyq tarıhynda alǵash ret Germanııa aýmaǵyndaǵy zaýytyn jabý týraly sheshim qabyldady. Bul týraly Financial Times (FT) basylymy habarlady, dep BELTA jazdy. 

Drezden qalasyndaǵy zaýytty jabý týraly sheshim kompanııanyń Qytaı men Eýropadaǵy satylymdarynyń tómendeýine baılanysty týyndaǵan qarjylyq qıyndyqtarmen baılanysty. Sonymen qatar, AQSh tarapynan engizilgen joǵary ımporttyq baj salyǵy da sebepterdiń biri retinde ataldy. Atalǵan zaýyttyń jabylýy Volkswagen-niń Germanııada 35 myń jumys ornyn qysqartý jónindegi baǵdarlamasynyń bir bóligi bolyp otyr.

Málimetke sáıkes, zaýyt 16 jeltoqsanda jumysyn tolyq toqtatady. Volkswagen ókilderi mundaı sheshim qabyldaý ońaı bolmaǵanyn, «ekonomıkalyq turǵydan qajetti bolǵanyn» málimdedi.

Drezdendegi óndiris 2002 jyly iske qosylǵannan beri shamamen 200 myń avtokólik shyǵarǵan. Endi Volkswagen-ke tıesili bul aýmaq Drezden ýnıversıtetine berilip, onda jasandy ıntellekt chıpterin ázirleýge arnalǵan zertteý kampýsy qurylmaq.

Buǵan deıin Volkswagen Qytaıdaǵy zaýytyn japqan edi.