Volgogradtaǵy vokzaldy «qamqorshy feldsher» jaryp jibergen
ASTANA. 30 jeltoqsan. QazAqparat - Jeksenbi, 29 jeltoqsan kúni shamamen 12:45-te Volgograd qalasynyń temirjol vokzalynda jarylys boldy. Sońǵy málimetter boıynsha, 17 adam qaza bolǵan, olardyń arasynda bir bala bar. Zardap shekken 31 adam aýrýhanalarda jatyr, dep habarlady Ýtro.rý.
Basynda jarylysty ózin-ózi jarǵan áıel adam jasady dep habarlandy. Qazir lańkestikti Marıı El Respýblıkasynda týǵan er adam Pavel Pechenkın jasady degen málimet paıda boldy. Ol bir jyl buryn ıslamdy qabyldap, Daǵystan Respýblıkasynyń aýmaǵynda áreket etetin banda qurylymy tobyna qosylǵan.
Pechenkın jedel járdem qyzmetinde feldsher bolyp istegen. Alaıda osy jyldyń basynda úıinen ketip, sol kúıi qaıtyp kelmegen. Anasy onyń ulyn zańsyz qarýlanǵan banda qurylymyna tartqanyn málimdedi. «Ol árqashan óte meıirimdi bala bolatyn, kómek kórsetip, emdeıtin. Barlyǵy onyń keń júrekti ári qamqor adam bolǵanyn biledi», - deıdi uly jaıly anasy. Onyń sózine qaraǵanda, Pechenkın Máskeýge «aqsha taýyp, jumys isteýge» ketkennen qaıtyp kelmegen.
Pechenkınniń ata-anasynyń aıtýyna qaraǵanda, uldarynyń qazirgi aty - Ansar Ar-Rýsı. Olar onyń ıslamdy qabyldaǵanyna qoldaý bildirgen. Paveldiń ákesi ulynyń ıslamdy qabyldaǵannan keıin jaqsy jaqqa ózgergenin, ákesine qarsy kelýin qoıyp, ishimdikten boıyn aýlaq salyp, meshitke baryp júrgenin aıtty.
Búgin Volgogradta bir táýlik ótpeı jatyp taǵy bir lańkestik oqıǵa oryn aldy. Dzerjınskıı aýdanyndaǵy bazar mańynda trolleıbýsta 18:10 kezinde jarylys bolǵan. Reseıdiń tergeý komıteti 14 adamnyń mert bolǵanyn naqtylady. Tergeý komıtetiniń nusqasy boıynsha, jarylys qurylǵysyn ózin-ózi jarǵan lańkes-er adam bolǵan. Onyń denesi genetıkalyq saraptamaǵa kim ekenin anyqtaý úshin jiberildi.
