Volgogradtaǵy Mamaı qorǵanynda qazaqstandyq jaýyngerlerge eskertkish ornatyldy
ORAL. QazAqparat - Volgograd qalasyndaǵy Mamaı qorǵanynda qazaqstandyq jaýyngerlerge eskertkish ornatyldy, dep habarlaıdy QazAqparat tilshisi.
Eskertkishtiń ashylý rásimine Qazaqstannan arnaıy delegatsııa qatysty.
Stalıngrad úshin bolǵan alapat shaıqasqa qatysyp, erlikpen qaza tapqan qazaqstandyqtarǵa arnalǵan monýmentke Qazaqstannyń qasıetti jerlerinen ákelingen arnaıy kapsýla salyndy.
«Generaldar keńesi» RQB tóraǵasy, general-maıor Rústem Qaıdarovtyń aıtýynsha, Qazaqstanda qurylǵan quramalardyń úshten biri derlik Stalıngrad maıdanynda soǵysty.
Delegatsııa quramynda Stalıngrad shaıqasyna qatysqan 95 jasar tarazdyq maıdanger Hamza Ǵafýrov ta boldy. Stalıngradty qorǵaý kezinde erlik kórsetip, sanaýly kúnder ishinde qos birdeı medalmen marapattalǵan ardager de esteligimen bólisti.
Stalıngrad shaıqasyna 100 myńdaı qazaqstandyq jaýynger qatyssa, solardyń kópshiligi maıdannan oralǵan joq. Іz-túzsiz ketkender de barshylyq. Osy oraıda qazaqstandyq jáne reseılik izdestirýshiler jasaqtary shaıqas bolǵan jerlerdi zerttep, jańa derekter tabýda.
Eskertkishtiń ashylý rásimine qatysqan Volgograd oblysynyń vıtse-gýbernatory Aleksandr Bloshkın Stalıngrad shaıqasynyń eshqashan umytylmaıtynyn, eki eldiń ortaq tarıhy bar ekendigin, sondyqtan ǵasyrlar boıy jalǵasyp kele jatqan dostyq qarym-qatynastyń aldaǵy ýaqytta da nyǵaıa beretinin jetkizdi.
Aıta keteıik, bıyl Stalıngrad shaıqasynyń jeńispen aıaqtalǵanyna 75 jyl tolǵany belgili. Soǵan oraı Reseı men Qazaqstanda jyl boıy sharalar ótýde.
Stalıngrad maıdany Batys Qazaqstan oblysymen tyǵyz baılanysty boldy. Maıdanmen Oral-Astrahan temir joly jalǵastyryp turdy. Osy temirjol boıyndaǵy Jánibek, Saıqyn, Shońaı stansalary talaı ret bombalanyp, jaýyngerlermen qatar turǵyndar da qaza tapty. Maıdanǵa tıip turǵan Jánibek, Orda (qazirgi Bókeı ordasy) aýdandary soǵys jaǵdaıynda dep jarııalandy.
