Volgogradtaǵy lańkestikten zardap shekkender arasynda Qazaqstan azamattary joq - QR SІM
ASTANA. 30 jeltoqsan. QazAqparat - Volgograd vokzalynda oryn alǵan lańkestikten zardap shekkender men qaza tapqandar arasynda Qazaqstan azamattary joq. Bul týraly búgin «QazAqparat» tilshisine QR Syrtqy ister mınıstrliginiń baspasóz qyzmeti habarlady.
«Biz Reseıdegi dıplomatııalyq ókildikke habarlastyq. Aldyn ala málimetter boıynsha, Volgograd vokzalynda oryn alǵan lańkestikten zardap shekkender men qaza tapqandar arasynda Qazaqstan azamattary joq», - dep atap ótti baspasóz qyzmeti.
Esterińizge sala keteıik, keshe Volgogradta Máskeý ýaqytymen 12.45-te (Astana ýaqytymen 14.45-te) temirjol vokzalynda jarylys boldy. Sońǵy málimetter boıynsha, jarylys saldarynan 16 adam kóz jumdy, ondaǵan adam zardap shekti. Nusqalardyń biri boıynsha, lańkestik áreketin daǵystandyq Oksana Aslanova jasaǵan bolýy múmkin.
