Voleıbolshy qyzdy betinen urǵan dene shynyqtyrý muǵalimi jumystan qýyldy

AQTAÝ. QazAqparat – Mańǵystaý oblysynda komanda oıynshysyna qol kótergen dene shynyqtyrý pániniń muǵalimi jumystan qýyldy, dep habarlaıdy QazAqparat.

Jańaózen qalalyq bilim bóliminiń basshysy Ysqaq Qulataev málim etkendeı, №3 mektep dırektory dene shynyqtyrý pániniń muǵalimin jumystan bosatý týraly tıisti buıryqqa 20 jeltoqsanda qol qoıǵan.

Buǵan deıin Mańǵystaý oblysynda er adam jarys kezinde voleıboldan qyzdar komandasynyń oıynshysyn betinen urǵany týraly jazǵan bolatynbyz. Vıdeo áleýmettik jelide taraǵan edi.

Mańǵystaý oblysynyń Dene shynyqtyrý jáne sport basqarmasy bul oqıǵa Munaıly aýdanynda jarys kezinde bolǵanyn jáne oǵan qatysy bar er adam jattyqtyrýshy emes, Jańaózen qalasy N3 orta mekteptiń dene shynyqtyrý páni muǵalimi ekenin málim etti.

«Ol jattyqtyrýshy emes. Jarysqa ony eshqandaı uıym jibergen joq, ol jeke tulǵa retinde qatysty. Atalǵan oqıǵanyń mán-jaıyn arnaıy komıssııa anyqtaıtyn bolady», - degen edi basqarmadan.