Voleıboldan Joǵarǵy lıganyń «B» tobyndaǵy áıelder komandalary arasyndaǵy el chempıonatyn almatylyqtar sátti bastady
ALMATY. 15 qarasha. QazAqparat - Almatydaǵy Oktıabr Jarylǵapov atyndaǵy sport kesheninde voleıboldan Joǵarǵy lıganyń «A» jáne «B» tobyndaǵy áıelder komandalary arasynda HHІ Qazaqstan chempıonatynyń birinshi týry ótip jatyr.
Alǵashqy 2 oıynnyń qorytyndysy boıynsha «A» tobynda 6 upaımen «Qostanaı» men «Gratsııa Astana KZ» kósh bastaýda. Olardan 1 upaıy kem óskemendik «Shyǵys-Qorǵasyn Qurylys» úshinshi satyda tur. «Spartak AMT» (Temirtaý) qorjynynda - 1, «Ertis-Qazhrom» (Pavlodar) men «Qaraǵandy-2» komandalarynda birde-bir upaı joq. Al bul toptan bıylǵy maýsymda «B» tobyna túsip qalǵan «Almatınochka-Almaty» komandasynyń qazirgi qarqyny kóńil qýantarlyqtaı bolyp otyr. Olar qazir 6 upaımen Ońtústik Qazaqstan oblysynyń «Qazyǵurt» komandasymen úzeńgi qaǵystyryp qatar kele jatyr. Odan keıingi oryndardy 3 upaımen Astananyń «Oqýshylar saraıy» men Qyzyljardyń «SKO» komandalary ózara bólisse, qorjyny bos kele jatqan Almaty oblsynyń «Jetisý-2» men Almatynyń «TsSKA-VKS-QazAST» voleıbolshylary týrnır kestesin túıindeýde.
