Voleıboldan «Jetisý» komandasy sýperkýbokty besinshi ret jeńip aldy
ASTANA. KAZINFORM – Óskemen qalasynda voleıboldan ulttyq lıganyń áıelder komandalary arasynda ótip jatqan kishi týr aıasynda Qazaqstannyń sýperkýbok ıegeri anyqtaldy.
Sýperkýbokty Qazaqstannyń toǵyz dúrkin chempıony «Jetisý» (Taldyqorǵan) men bıylǵy el kýbogynyń ıegeri «Turan» (Túrkistan) komandasy sarapqa saldy.
Taldyqorǵandyqtardy sońǵy jyldary serbııalyq maman Marko Grshıch jattyqtyrsa, túrkistandyq qyzdardy Asqar Shalqybekov baptap keledi.
Bul joly «Jetisý» 3:0 (25:22, 25:22, 25:17) esebimen jeńiske jetti.
Osylaısha, taldyqorǵandyq klýb besinshi ret sýperkýbok ıegeri atandy. Buǵan deıin «Jetisý» 2015, 2018, 2019, 2024 jyldary sýperkýbokti utyp alǵan edi.
Qazaqstan chempıonatynda da «Jetisý» kósh bastasa, «Qýanysh» (SQO) ekinshi, Óskemenniń «Bereli» úshinshi satyda tur. Bıylǵy maýsymda túrkistandyqtar da júldeli oryndardan dámeli ekendigin baıqatty.
Eske sala keteıik, budan buryn voleıboldan Ortalyq Azııa chempıondar lıgasynda «Turannyń» el namysyn qorǵaıtynyn jazǵan edik.
