Voleıboldan Ulttyq lıgadaǵy áıelder komandalary arasyndaǵy el chempıonatynyń 3-inshi týry Astanada ótedi
ALMATY. 14 qańtar. QazAqparat /Erlik Erjanuly/ - Astanada 15-22 qańtar kúnderi voleıboldan Ulttyq lıgadaǵy áıelder komandalary arasynda HH Qazaqstan chempıonatynyń 3-inshi týr oıyndary bolady.
Qazir týrnır kestesinde alǵashqy 2 týrdyń qorytyndysy boıynsha 36 upaımen «jetisýlyqtar» (Almaty oblysy) kósh bastap tur. Olardan 10 upaıǵa artta qalyp qoıǵan Pavlodar oblysynyń («Ertis-Qazhrom») voleıbolshylary 2-nshi orynda keledi. Pavlodardan keıingi astanalyqtardyń qorjynynada 25 upaı bar. Ótken týrda almatylyqtardy basyp ozǵan Qaraǵandy oblysynyń komandasy («Qaraǵandy») 14 upaımen 4-inshi orynǵa ornalassa, «Almaty» - 10, «Metallýrg AMT» (Temirtaý) - 9, «Shyǵys-QorǵasynQurylys» (Óskemen) - 4 upaımen 5, 6 jáne 7-nshi oryndardy sáıkesinshe ıelendi.
Astanada ótetin 3-inshi týr oıyndary pavlodarlyqtar men óskemendikterdiń, almatylyqtar men qaraǵandylyqtardyń, astanalyqtar men temirtaýlyqtardyń arasyndaǵy kezdesýlermen bastalady. Al jupsyz qalǵan Almaty oblysynyń voleıbolshylary alǵashqy oıynyn 16 qańtarda pavlodarlyq qurdastarymen ótkizbek.
