Voleıboldan «Qýanysh» klýby Azııa chempıony atandy
NUR-SULTAN. QazAqparat – Semeı qalasynda voleıboldan áıelder komandalary arasynda Azııa klýbtyq chempıonaty márege jetti, dep habarlaıdy QazAqparat tilshisi.
Jarystyń sońǵy kúninde óskemendik «Altaı» men soltústikqazaqstandyq «Qýanysh» komandalary fınalda altyn júldeni sarapqa saldy.
Qazaqstannan osy kezge deıin «Rahat» jáne «Altaı» komandalary Azııa klýbtyq chempıonatynda úzdik shyqqan edi. Onyń ústine, serbııalyq maman Marko Grshıch jattyqtyratyn óskemendik klýb bıyl alty dúrkin el chempıony atanǵan. Al, Qazaqstan chempıonatynyń qola júldegeri, taǵy bir serbııalyq maman Darko Dobreskov baptaıtyn «Qýanyshtyń» mundaı deńgeıdegi dodaǵa tuńǵysh qatysýy.
Osy Azııa klýbtyq chempıonaty barysynda «Altaı» birinshi oıynda «Qýanyshtan» 3:1 esebimen basym túsken-di. Soltústikqazaqstandyqtar qalǵan kezdesýlerin sátti ótkizip, fınalǵa joldama alǵan bolatyn.
Sońǵy básekede naǵyz fınalǵa tán oıyn boldy. Aldyńǵy eki partııany 26:24, 25:21 esebimen «Altaı» utty. Endi bir setti alsa, jetetin edi. Alaıda, asa tartysty órbigen úshinshi partııa 30:28 esebimen «Qýanyshtyń» enshisinde ketti. Sosyn olar 25:23 esebimen taǵy bir setti aldy. Besinshi, sheshýshi partııada «Qýanyshty» tejeý tipti múmkin bolmady – 15:6.
Osylaısha, eki saǵattan astam ýaqytqa sozylǵan matchta 3:2 esebimen jeńiske jetken soltústikqazaqstandyq klýb óz tarıhynda alǵash ret Azııa chempıony atandy. Endi D. Dobreskovtyń shákirtteri álem klýbtyq birinshiligine qatysady.
Taılandtan kelgen «Diamond Food-Fine Chef Sport Club» komandasy qola júldege ıe boldy.
Sondaı-aq, túrli atalymdar boıynsha úzdik voleıbolshylar marapattaldy.
Eske sala keteıik, budan buryn voleıboldan «Altaı» klýbynyń Azııa chempıonatynyń fınalyna shyqqanyn jazǵan bolatynbyz.
