Voleıboldan QR birinshiligi: El chempıony «Altaı» «Jetisý» komandasyn utty
PETROPAVL. QazAqparat – Petropavl qalasynda voleıboldan Ulttyq lıganyń áıelder komandalary arasynda 30-ynshy Qazaqstan chempıonaty tórtinshi týrynyń oıyndary márege jetti, dep habarlaıdy QazAqparat tilshisi.
Búgin ótken jylǵy el chempıony «Altaı» (Óskemen) men kúmis júldeger «Jetisý» (Taldyqorǵan) alańǵa shyqty.
Bul oıyn 28 jeltoqsan kúni ekinshi týr aıasynda Taldyqorǵan qalasynda ótýi kerek edi. Alaıda birneshe voleıbolshydan koronavırýs anyqtalýyna baılanysty keıinge qaldyrylǵan edi.
«Altaıdy» serbııalyq maman Marko Grshıch jattyqtyryp kele jatsa, «Jetisý» komandasynyń tizginin ótken jyly belgili voleıbolshy Elena Pavlova alǵan edi.
Sońǵy jyldary altyn júldege talasyp júrgen qos klýbtyń kezdesýi bul joly da tartysty boldy. Alǵashqy eki partııada óskemendikter 25:23, 25:19 esebimen basym tústi. Alaıda úshinshi set barysynda «Altaıdyń» kapıtany, Oral voleıbolynyń túlegi Sana Anarqulova jaraqat alyp qaldy. Osyny da paıdalanǵan taldyqorǵandyqtar bul partııada aıqyn basymdylyq kórsetti – 25:14. Degenmen Sana alańǵa qaıta shyqqannan keıin tórtinshi sette «Altaı» sheberliginiń basym ekendigin baıqatty – 25:19. Esep – 3:1.
Bıylǵy maýsym barysynda «Qýanysh» (SQO) ta «Altaı» men «Jetisý» komandasyna básekeles bola alatyndyǵyn kórsetti. Týrnır kestesinde «Altaı» top bastasa, «Qýanysh» ázirge ekinshi, «Jetisý» úshinshi orynda keledi.
El birinshiliginiń qorytyndy, besinshi týry Taldyqorǵan qalasynda 12-20 naýryzda ótip, pleı-off básekeleri barysynda jeńimpaz-júldegerler anyqtalady.
Eske sala keteıik, budan buryn «Altaıdyń» besinshi ret el chempıony atanǵanyn jazǵan bolatynbyz.
