Voleıboldan klýbtyq Azııa chempıonaty: «Altaı» arýlary Irandy utty

«Altaı» komandasynyń alǵashqy oıyny ala-qulalyǵymen este qaldy. Áıtse de, ırandyq arýlar jarys ıelerine 3 kezeńde de jol berdi. Esep - 18:25, 16:25, 17-25. Eki komanda da kezek-kezek qatelikterge boı aldyryp, kezdesýdiń ortasynda ǵana es jıdy. Oıyn barysynda «Altaıdyń» negizgi oıynshylarynyń biri - Alla Bogdashkınanyń eski jaraqaty syr berip, aıaǵynan basa almaı qaldy.

Komandanyń bas bapkeri ıÝrıı Panchenko kezdesý sońyndaǵy baspasóz máslıhatynda oıynshynyń qashan qatarǵa qosylatynyn aıtý qıyn ekenin málimdedi.

«Sportshynyń jaǵdaıy dárigerlerdiń tekserýinen keıin ǵana belgili bolady. Oıyn esebi bizdiń paıdamyzǵa jazylǵanymen, aýyr ótti.  Óz alańymyzda, myńdaǵan kórermenniń aldynda psıhologııalyq qysym joǵary bolady. Qansha degenmen, birinshi oıynymyz ǵoı. Qalǵan oıyndarǵa shıryǵyp shyǵýymyz qajet» - dedi bas bapker.

Al oramal taqqan ırandyq arýlardyń bapkeri shákirtteriniń dene qyzdyryp úlgere almaǵanyn alǵa tartty.

"Chempıonattyń ashylý saltanatynan soń birden oıyn bastaldy. Oǵan deıin alań bos bolǵan joq. Sondyqtan, 30 mınýt ýaqyt qyzdardyń dene qyzdyrýyna jetpeı qaldy. Bul búkil oıynǵa óz áserin tıgizbeı qoıǵan joq»,- dedi ırandyq bapker.

«Altaı» klýby bul baıraqty básekege bıyl ekinshi márte qatysyp otyr. Byltyr olar jalpy esepte tórtinshi orynǵa taban tiregen bolatyn. El chempıondary «V» tobynda óner kórsetýde. Kelesi sheshýshi oıyndy olar 13 shilde kúni Taıbeı chempıondaryna qarsy ótkizedi. Búgin «A» tobyndaǵy Taıland komandasy qytaılyq voleıbolshylardy jeńse, «S» tobynda Shrı-Lanka voleıbolshylary Vetnam klýbynan basym tústi.

Óskemende voleıboldan áıelder arasyndaǵy klýbtyq Azııa chempıonaty bastalǵanyn buǵan deıin habarlaǵan bolatynbyz. ShQO-da ekinshi márte ótip jatqan dodaǵa Qytaı, Indonezııa, Iran, Qazaqstan, Taıland, Shrı-Lanka, Vetnam, Taıbeı, Japonııa elderiniń ulttyq chempıonattarynda top jarǵan 9 komanda qatysýda.

Qazaqstan namysyn jergilikti «Altaı» komandasy qorǵaýda.