Voleıboldan Qazaqstan quramasy Fılıppındegi týrnırdiń jartylaı fınalyna shyqty

MANILA. KAZINFORM - Fılıppınde áıelder komandalary arasynda voleıboldan ótip jatqan "AVC shaqyrý kýbogi" týrnırinde Qazaqstan quramasy jartylaı fınalǵa shyqty.

Rıshat Gılıazýtdınovtiń shákirtteri V tobyndaǵy sońǵy oıynyn Gonkong quramasymen ótkizdi.
Budan buryn Vetnamǵa 1:3 esebimen ese jibergen qazaqstandyqtarǵa jartylaı fınalǵa shyǵý úshin jeńis aýadaı qajet edi.

Qazaqstan quramasynyń kapıtany, Oral voleıbolynyń túlegi Sana Anarqulova bastaǵan qazaqstandyqtar jankúıerlerin jerge qaratpaı, 3:0 (25:17, 25:18, 25:4) esebimen jeńiske jetti.

Qazaqstan fınalǵa shyǵý úshin Fılıppın quramasymen sheberlik talastyrady.

Atalmysh týrnır chempıony "Segizdik fınalyna" joldama alady. Onda Ulttar lıgasynyń bir ǵana joldamasy sarapqa salynady.

Eske sala keteıik, budan buryn joǵary lıga komandalary arasynda chempıon atanǵan "Gratsııa-KZ" Ulttyq lıgaǵa joldama alǵanyn jazǵan bolatynbyz.