Voleıboldan Qazaqstan quramalary qurlyqtyq týrnırde jeńimpaz atandy
ASTANA. QazAqparat - Voleıboldan Qazaqstannyń áıelder jáne erler quramalary Almatyda márege jetken Shaqyrý kýbogynyń qurlyqtyq irikteý týrnırinde jeńimpaz atandy, dep habarlaıdy QazAqparat tilshisi.
Jarystyń sońǵy kúni qazaqstandyq quramalar Qytaı Taıpeıimen alańǵa shyqty.
Birinshi partııada taıpeılik qyzdar alǵa ketti. Vıacheslav Shaprannyń shákirtteri olardy qýyp jetkenimen, taıpeılikter 26:24 esebimen jeńiske jetti.
Ekinshi partııaǵa tastúıin shyqqan qazaqstandyqtar oıyn tizginin ýysynan shyǵarǵan joq. Ásirese, Ekaterına Jdanova, Olga Drobyshevskaıa, Alesıa Safronova jáne Oral voleıbolynyń túlegi Sana Anarqulova shabýyl shebinde jarqyraı kórindi. Qazaqstandyqtar qalǵan úsh partııada 25:18, 25:17, 25:14 esebimen basym tústi.
Munyń aldynda osy týrnırde avstralııalyqtardy tize búktirgen Qazaqstan quramasy maýsym aıynyń sońynda ótetin Shaqyrý kýbogynyń fınaldyq bóliginde oınaýǵa joldama aldy.
Igor Nıkolchenko jattyqtyratyn Qazaqstannyń erler quramasyna da taıpeılikter qarsy tura almady. Birinshi partııada qazaqstandyqtar 25:19 esebimen jeńiske jetse, asa tartysty ótken ekinshi set 27:25 esebimen I.Nıkolchenko shákirtteriniń basymdylyǵymen aıaqtaldy. Úshinshi partııany qazaqstandyqtar 25:20 esebimen túıindedi.
Munyń aldynda Pákstan quramasyn 3:1 esebimen utqan qazaqstandyqtar sapynda Oral voleıbolynyń túlekteri, shabýylshy Vıtalıı Vorıvodın, tájirıbeli lıbero Qaırat Baıbekov oınady.
Qazaqstan voleıbol federatsııasynyń saıtynan alynǵan málimetke qaraǵanda, elimizdiń erler quramasy Shaqyrý kýbogyna qatysý úshin jarysty jalǵastyrady. Endi olar fınaldyq saıysqa joldama alý úshin ońtústikamerıkalyq irikteý týrnırinde jeńimpaz atanǵan komandamen synǵa túsedi.
Aıta keteıik, Halyqaralyq voleıbol federatsııasy bıyl Álemdik Gran-prı jáne Álemdik lıganyń ornyna jańa týrnır - Ulttar lıgasyn uıymdastyrdy. Bul lıgada álemniń eń kúshti 16 komandasy oınaıdy. Qalǵan quramalar oǵan qatysý úshin Shaqyrý kýbogynda sátti óner kórsetip, joldamany jeńip alýy kerek.
