Voleıboldan Qazaqstan kýbogynyń fınalyna shyqqan komandalar belgili boldy

ASTANA. KAZINFORM – Astanadaǵy Jaqsylyq Úshkempirov atyndaǵy jekpe-jek saraıynda voleıboldan erler komandalary arasynda Qazaqstan kýbogynyń jartylaı fınaldyq matchtary asa tartysty ótti. 

Birinshi jartylaı fınalda «Atyraý» men bıylǵy el chempıony «Jaıyq» (Oral) komandalary kezdesti.

Atyraýlyqtar birinshi jáne ekinshi sette 28:26, 25:18 esebimen basymdylyq tanytty. Budan keıin oraldyqtar tarazy basyn teńestirdi – 25:19, 25:23. Besinshi, sheshýshi partııa sońynda atyraýlyqtar 14:12 esebimen alda turǵanymen, oraldyqtar qýyp jetti. Alaıda sheshýshi upaı «Atyraýdyń» enshisinde ketti – 16:14. Qorytyndy esep - 3:2, Igor Nıkolchenko shákirtteriniń paıdasynda.

Ekinshi oıyn da bes partııada aıaqtaldy. Munda «Jetisý» ótken jylǵy kýbok ıegeri «Aqtóbeni» 3:2 (25:22, 22:25, 25:21, 18:25, 16:14) esebimen qapy qaldyrdy. 

Osylaısha, Qazaqstan kýbogyn «Atyraý» men «Jetisý» (bas bapkeri Marat Adryshev) sarapqa salady.

Eske sala keteıik, budan buryn «Jetisýdyń» álemdegi úzdik bes klýbtyń qataryna kirgenin jazǵan edik.