Voleıboldan Qazaqstan kýbogy: jartylaı fınalǵa shyqqan komandalar belgili boldy

AQTÓBE. KAZINFORM – Aqtóbe qalasynda voleıboldan erler komandalary arasynda Qazaqstan kýbogynyń jartylaı fınalyna shyqqandar anyqtaldy.

Jańa maýsym qarsańynda qazaqstandyq klýbtar quramynda birshama ózgerister bolǵany baıqalady.

El kýbogy úshin shırek fınal oıyndary barynsha tartysty ótti.

Serbııalyq maman Deıan Výlıchevıch jattyqtyratyn «Atyraý» komandasy osyǵan deıin A tobynda qarsylas shaq keltirmese, shırek fınalda «Jetisý» klýbynan (bas bapkeri Marat Adryshev) 1:3 esebimen utylyp qaldy.

Bıylǵy Qazaqstan chempıonatynyń kúmis júldegeri, ótken jyly kýbokty utyp alǵan, reseılik Sergeı Grıbov baptaıtyn «Pavlodar» bıylǵy el birinshiliginiń jeńimpazy «Tarazdan» 3:1 esebimen basym tústi.

Taǵy bir tartysty kezdesý «Jaıyq» (Oral) pen «Býrevestnık» (Almaty) arasynda boldy. Kezinde oraldyq «Kondensatty» jattyqtyrǵan Igor Nıkolchenko jańa maýsymda almatylyq komandanyń tizginin qolyna aldy. Matchty almatylyqtar sátti bastady – 25:23. Alaıda budan keıin Vıktor Kozıktiń shákirtteri kambek jasaı bildi – 27:25, 33:31, 25:23. Jalpy esep – 3:1. Báseke barysynda reseılik Vıtalıı Vasılevti almastyrǵan qazaqstandyq Vıtalıı Erdshteın oıynǵa tyń lep qosa aldy.

Sergeı Trıkoz baptaıtyn «Aqtóbe» soltústikqazaqstandyq «Esildi» joldan taıdyrdy – 3:0 (25:22, 25:16, 26:24).

Senbi kúni «Aqtóbe» - «Pavlodar», «Jaıyq» - «Jetisý»» komandalary jartylaı fınalda ózara kezdesedi. Qalǵan klýbtar 5-8 oryndar úshin talasady.

Eske sala keteıik, budan buryn Aqtóbede voleıboldan Qazaqstan kýbogynda shırek fınalǵa shyqqan komandalardyń anyqtalǵanyn jazǵan bolatynbyz.