Voleıboldan Qazaqstan kýbogy: áıelder arasynda jartylaı fınalǵa shyqqandar anyqtaldy

PETROPAVL. KAZINFORM – Petropavl qalasynda voleıboldan áıelder komandalary arasynda Qazaqstan kýbogy jarysynda jartylaı fınalǵa shyqqandar anyqtaldy.

A tobynda barlyq úsh kezdesýinde qarsylastaryn utyp, úzdik shyqqan «Jetisý» (Taldyqorǵan) jeńisti jolyn shırek fınalda jalǵastyrdy.

Serbııalyq maman Marko Grshıchtiń shákirtteri B tobynda tórtinshi oryn alǵan «Aqtóbeni» buıym qurly kórgen joq – 3:0 (25:15, 25:18, 25:7).

Bıylǵy el chempıony, Asqar Shalqybekov jattyqtyratyn «Turan» (Túrkistan) shırek fınalda «Qaraǵandyny» 3:1 (21:25, 25:21, 25:19, 25:15) esebimen tize búktirdi.

Shırek fınaldyq úshinshi básekede «Berel» (Óskemen) jáne «Almaty» komandalary betpe-bet keldi. Bir qyzyǵy, óskemendikterdi Rıshat Gılıazýtdınov jattyqtyrsa, «Almatynyń» bas bapkeri – onyń týǵan aǵasy Rafael Gılıazýtdınov. Bul oıynda óskemendikter basym boldy - 3:0 (26:24, 25:10, 25:14).

Sońǵy matchta B tobynyń úzdigi, alań ıeleri «Qýanysh» (bas bapkeri – Azamat Esimov) pen «Arý-Astana» kezdesti. Buǵan deıin óz tobynda kósh sońynda qalǵan astanalyqtar favorıtke qatty qarsylyq kórsetti. Birinshi partııada soltústikqazaqstandyqtar 25:17 esebimen sheberligin tanytqanymen, ekinshisin «Arý-Astana» alyp ketti – 25:22. Tipti olar úshinshi partııada da alda kele jatty. Biraq «Qýanysh» óz degenine jetti – 26:24, 25:13. Jalpy esep – 3:1.

Osylaısha, jeksenbi kúni jartylaı fınalda «Jetisý» - «Berel», «Turan» - «Qýanysh» komandalary sheberlik baıqasady.

Eske sala keteıik, budan buryn voleıboldan erler arasynda «Aqtóbeniń» alǵash ret Qazaqstan kýbogyn jeńip alǵanyn jazǵan bolatynbyz.