Voleıboldan Qazaqstan chempıonatynda «Jetisý» «Qýanysh» komandasyn tize búktirdi

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda XXXIII Qazaqstan chempıonaty birinshi týrynyń jeksenbi kúngi oıyndary aıaqtaldy.

Búgin «Jetisý» (Taldyqorǵan) jáne «Qýanysh» (SQO) komandalary arasynda tartysty báseke boldy.

Óz sporttyq jolynda segiz márte el chempıony atanǵan taldyqorǵandyqtar bıylǵy maýsymdy sátti bastap, sýperkýbokty tórtinshi ret jeńip aldy. Al sońǵy jyldary júldeli oryndardan kórinip júrgen soltústikqazaqstandyqtar (bas bapkeri Azamat Esimov) bıyl Azııa klýbtyq chempıonatynda óner kórsetip, tórtinshi orynǵa taban tiregen bolatyn.

Bul joly komandalar partııalar barysynda alma-kezek alǵa shyqqanymen, serbııalyq maman Marko Grshıchtiń shákirtteri jeńisti julyp aldy – 3:0 (25:23, 25:23, 25:21).

Kósh sońyndaǵy Pavlodardyń «Ertisin» 3:0 (25:11, 25:17, 25:12) esebimen utqan «Qaraǵandy» 12 upaımen týrnır kestesinde top bastap keledi.

Ulttyq lıgaǵa bıyl qosylǵan «Gratsııa KZ» (Oral) komandasyn 3:1 (25:17, 12:25, 25:11, 25:9) esebimen jeńgen Óskemenniń «Bereli» 11 upaımen ekinshi orynda. «Jetisý» 10 upaımen úzdik úshtikti túıindep tur.

Chempıonat debıýtanty «Gratsııa KZ» klýbynyń (bas bapkeri Aına Ǵubasheva) enshisinde ázirge bir ǵana upaı bar. Komanda jattyqtyrýshylarynyń biri Nursulý Ǵubashevanyń sózine qaraǵanda, «Gratsııa KZ» quramynda qazirgi kezde eki taılyq, bir almatylyq, bir qostanaılyq oıynshy bar. Qalǵandarynyń bári – Oral voleıbolynyń túlekteri. Bıyl Zarına Sıtqazınova komandaǵa qaıtyp oraldy.

Eske sala keteıik, budan buryn voleıboldan Qazaqstan chempıonatynda ortalyq matchta «Berel» «Jetisý» klýbyn utqanyn jazǵan edik.