Voleıboldan Qazaqstan chempıonatynda «Jetisý» kósh bastady

ASTANA. KAZINFORM – Petropavl qalasynda voleıboldan áıelderdiń ulttyq lıga komandalary arasynda Qazaqstan chempıonatynyń úshinshi týrynda ortalyq match «Berel» (Óskemen) men «Jetisý» (Taldyqorǵan) arasynda boldy.

Osyǵan deıin Rıshat Gılıazýtdınov jattyqtyratyn óskemendikter jeńis sany (19) jóninen alda tursa, 18 oıynda utqan Marko Grshıchtiń shákirtteri upaıdy eń kóp (56) jınaǵan komanda edi.

Taldyqorǵandyqtar kezdesýdi sátti bastady – 25:23. Olar ekinshi kezeńde 24:21 esebimen alda turdy. Biraq sol múmkindikterin paıdalana almaı, ese jiberip qoıdy – 26:28.

Úshinshi setti óskemendikter óz esebine jazdy – 25:23.

Tórtinshi kezeńde «Jetisý» tarazy basyn aýdardy – 26:24.

Sodan keıin besinshi partııada des bergen joq – 15:9.

Jalpy esep – 3:2, taldyqorǵandyqtardyń paıdasynda.

«Jetisýdan» Karına Denısova, «Berelden» Krıstına Belova úshinshi týrdyń úzdik oıynshysy atandy.

Osylaısha, jeńis sanyn 19-ǵa jetkizip, 58 upaı jınaǵan taldyqorǵandyqtar týrnır kestesinde kósh bastady.

Óskemendikter 55 upaımen ekinshi orynda qaldy.

Eske sala keteıik, budan buryn voleıboldan «Turan» komandasynyń úshinshi týrdy tórtinshi orynmen aıaqtaǵanyn jazǵan edik.