Voleıboldan Qazaqstan chempıonatynda «Jetisý» kósh basyna shyqty

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynda «Jetisý» (Taldyqorǵan) klýby kósh basyna shyqty.

Serbııalyq maman Marko Grshıch jattyqtyratyn taldyqorǵandyqtar juma kúni kósh sońyndaǵy «Ertisti» (Pavlodar) 3:0 (25:12, 25:6, 25:8) esebimen oısyrata jeńdi.

«Jetisý» 28 upaımen birinshi orynda tur. Biraq ony bir oıyny kem «Berel» (Óskemen) qýyp jete alady.

Oraldyń «Gratsııa KZ» komandasyn 3:0 (25:21, 25:13, 25:17) esebimen tize búktirgen «Qýanysh» (SQO) 24 upaımen úshinshi satyda keledi. 

«Aqtóbeni» 3:0 (25:21, 25:22, 25:17) esebimen utqan «Qaraǵandy» 21 upaımen tórtinshi orynǵa ornyqty. 

Osyǵan deıin eki ret qatarynan jeńilgen el chempıony «Turan» (Túrkistan) bul joly «Almatyny» 3:1 (25:21, 23:25, 25:14, 25:17) esebimen qapy qaldyrdy. Túrkistandyqtar 17 upaımen besinshi satyda keledi. 

Senbi kúni «Almaty» - «Aqtóbe», «Arý-Astana» - «Turan», «Ertis» - «Qaraǵandy», «Jetisý» - «Qýanysh», «Gratsııa KZ» - «Berel» komandalary ózara oınaıdy.

Eske sala keteıik, budan buryn «Turannyń» ekinshi ret qatarynan jeńilip qalǵanyn jazǵan bolatynbyz.