Voleıboldan Qazaqstan chempıonatynda úsh birdeı komanda jeńilissiz keledi
ASTANA. KAZINFORM — Voleıboldan áıelderdiń ulttyq lıga komandalary arasynda ekinshi týrdyń oıyndary máresine jetti.
El chempıony ári sýperkýbok ıegeri «Jetisý» komandasy Túrkistanda «Turandy» eki ret utty.
Taldyqorǵandyqtar aldymen alań ıelerin aıqyn basymdylyqpen jeńdi — 3:0 (25:17, 25:14, 25:11). Juma kúngi ekinshi oıyn sál tartystylaý órbip, 3:1 (25:10, 20:25, 25:13, 25:19) esebi tirkeldi.
Sondaı-aq Óskemenniń «Bereli» óz alańynda eki matchta da qaraǵandylyqtarǵa esh múmkindik qaldyrmady — 3:0 (25:11, 25:11, 25:12), 3:0 (25:17, 25:17, 25:15).
Sol sekildi «Qýanysh» Petropavlda Pavlodardyń «Ertisinen» 3:1 (25:18, 22:25, 25:22, 25:17) jáne 3:0 (25:18, 25:19, 25:9) esebimen basym tústi.
Qazirgi kezde týrnır kestesinde «Jetisý», «Berel» jáne «Qýanysh» komandalary 12 upaımen quıryq tistesip keledi.
Almatynyń «Býrevestnıgi» óz alańynda aqtóbelikterdi 3:0 (25:21, 25:10, 25:13) jáne 3:0 (25:22, 25:19, 25:19) esebimen tize búktirip, alǵashqy alty upaıyna qol jetkizdi.
Kelesi týrda «Jetisý» óz alańynda 27-28 qazan kúnderi «Qýanyshty» qabyldaıdy. Bul básekeler kósh basyndaǵy qos komanda úshin de mańyzdy bolmaq.
Eske sala keteıik, budan buryn voleıboldan Qazaqstan chempıonaty alǵashqy týrynyń oıyndary aıaqtalǵanyn jazǵan edik.
