Voleıboldan Qazaqstan chempıonatynda «Turan» «Jetisý» komandasynan aılasyn asyrdy

PETROPAVL. KAZINFORM – Petropavl qalasynda voleıboldan áıelderdiń Ulttyq lıga komandalary arasynda HHHІІ Qazaqstan chempıonatynyń tórtinshi týrynda Túrkistannyń «Turany» «Jetisý» komandasymen sheberlik baıqasty.

Serbııalyq maman Marko Grshıch jattyqtyratyn «Jetisý» osy týr barysynda qatarynan eki ret jeńiske jetip, týrnır kestesinde úshinshi satyǵa kóterilgen edi.

Bul joly «Jetisý» klýbyna Asqar Shalqybekovtiń shákirtteri kedergi qoıdy. Oral voleıbolynyń túlegi Sana Anarqulova bastaǵan túrkistandyq qyzdar asa tartysty matchta azýly qarsylasyn 3:2 (22:25, 25:22, 27:25, 21:25, 15:13) esebimen tize búktirdi.

Osy oıynnan keıin 49 upaı jınaǵan «Turan» burynǵysha ekinshi oryndy ustap tur.

Pleı-off básekesine 8 komanda joldama alatynyn eskersek, «Qýanysh» (SQO), «Turan», «Jetisý», «Berel» (ShQO), «Almaty» jáne «Ertis» (Pavlodar) komandalary bul máseleni sheship qoıdy. Qalǵan eki orynǵa «Qaraǵandy», «Altaı» (ShQO) jáne «Aıqarakóz» (Taldyqorǵan) talasýda. Búgin qaraǵandylyqtar «Aıqarakózdi» 3:1 (23:25, 25:17, 25:23, 25:22) jeńip, 12 upaımen 7-satyǵa ornyǵa tústi.

Eske sala keteıik, budan buryn voleıboldan QR chempıonatynda «Jetisý» qatarynan ekinshi ret jeńiske qol jetkizgenin jazǵan bolatynbyz.