Voleıboldan Qazaqstan chempıonatynda Oraldyń «Jaıyǵy» kósh bastady

PAVLODAR. KAZINFORM — Pavlodar qalasynda voleıboldan erlerdiń ulttyq lıga komandalary arasynda Qazaqstan chempıonatynyń oıyndary ótip jatyr.

Qazaqstandyq maman Vıktor Kozık jattyqtyratyn Oraldyń «Jaıyǵy» atyraýlyqtardy 3:0 (25:16, 25:17, 25:11) esebimen utty.

Osylaısha, 16 upaı jınaǵan oraldyqtar týrnır kestesinde birinshi orynǵa kóterildi.
Buǵan deıin kósh bastaǵan «Jetisý» (Taldyqorǵan) Almatynyń «Býrevestnıginen» jeńilip qaldy — 0:3 (24:26, 20:25, 18:25).

«Pavlodar» el chempıony «Tarazdy» 3:0 (25:15, 27:25, 31:29) esebimen tize búktirdi.
Alań ıeleri 15 upaımen «Jetisý» klýbymen teńesti.

Kýbok jáne sýperkýbok ıegeri «Aqtóbe» SQO-nyń «Esilinen» basym tústi — 3:0 (25:13, 25:20, 25:18).

Juma kúni «Atyraý» — «Jetisý», «Ushqyn-Kókshetaý» — «Aqtóbe», «Esil» — «Jaıyq», «Býrevestnık» — «Pavlodar» komandalary qaı myqtyny anyqtaıdy.

Eske sala keteıik, budan buryn Pavlodar qalasynda voleıboldan erlerdiń ulttyq lıga komandalary synǵa túsetinin jazǵan bolatynbyz.