Voleıboldan Qazaqstan chempıonatynda qola júlde úshin básekede «Atyraý» esepti teńestirdi

ORAL. KAZINFORM – Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonatynda «Atyraý» men «Jetisý» komandalary qola júlde úshin ekinshi kezdesýin ótkizdi.

Keshe birinshi oıynda Marat Adryshev baptaıtyn taldyqorǵandyqtar 3:1 esebimen jeńiske jetken edi. 

Bul joly bastapqy partııada Aıbek Jaqsylyqov bastaǵan jetisýlyqtar aıqyn basymdylyq kórsetti – 25:13.

Esesine tartysty ótken ekinshi sette Islam Jumabekovtiń shákirtteri ese qaıyrdy – 26:24. Budan keıin «Atyraý» kapıtany Bekarys Ǵabıtuly, Petr Chýrzın, baılanystyrýshy Aıbol Ótegenov, reseılik Ivan Nıkıshın syndy atyraýlyqtar sátti oınap, kúsh alyp ketti – 25:13, 25:16. 

Osylaısha, qola júlde úshin básekede tarazy basy teńesti – 1:1. Erteń úshinshi matchta qola medal ıesi anyqtalady.

Búgin «Býrevestnık» (Almaty) ótken jylǵy kúmis júldeger «Pavlodardy» 3:2 (25:18, 25:8, 35:37, 17:25, 15:11) esebimen tize búktirip, besinshi orynǵa ıe boldy.

Ótken jylǵy chempıon «Taraz» SQO-nyń «Esilin» 3:0 (25:16, 25:16, 25:22) utyp, 7-satyǵa turaqtady. 2024 jyly qola alǵan «Esil» bıyl 8-orynda qaldy. 

Eske sala keteıik, budan buryn voleıboldan Qazaqstan chempıonatynda qola júlde úshin básekede «Jetisý» klýbynyń «Atyraýdan» basym túskenin jazǵan edik.

Sondaı-aq «Aqtóbe» chempıondyq úshin alǵashqy kezdesýde «Jaıyqty» jeńdi.