Voleıboldan Qazaqstan chempıonatynda «Qaraǵandy» qatarynan besinshi jeńisine qol jetkizdi

ÓSKEMEN. KAZINFORM – Voleıboldan áıelderdiń ulttyq lıga komandalary arasynda Óskemen qalasynda ótip jatqan XXXIII Qazaqstan chempıonatynyń birinshi týrynda «Qaraǵandy» klýby jekedara kósh bastap keledi.

Osyǵan deıin tórt kezdesýinde jeńiske jetken Nurlan Sadyqovtyń shákirtteri seısenbi kúni Oraldyń «Gratsııa KZ» komandasyn synap kórdi. 

Ulttyq lıgaǵa bıyl ǵana qosylǵan oraldyq klýbtyń basqalardan bir ereksheligi, ákesi Kóleńke men anasy Nursulýdyń isin jalǵastyryp kele jatqan bas bapker Aına Ǵubasheva negizinen komandanyń óz túlekterine senim artýda. Bul joly da, mysaly, Kúnbóbek Saıasatova, Dana Saılybekova, Karına Tólegenova, Vıoletta Fılıppova syndy jas voleıbolshylar alańǵa shyqty.

Birinshi partııada batysqazaqstandyqtar 5:1 esebimen alǵa ketip, qaraǵandylyqtardy sastyrǵandaı boldy. Degenmen quramynda Ekaterına Jdanova, Natalıa Jýrba, Elenora Kýshnerova, Natalıa Hazova sekildi tájirıbeli oıynshylary jetkilikti «Qaraǵandy» komandasy tez es jıyp, úsh sette jeńiske jetti – 3:0 (25:18, 25:15, 25:20).
Osylaısha, qaraǵandylyqtar 15 upaımen týrnır kestesinde kósh basynda kele jatsa,

«Jetisý» (13 upaı) ázirge ekinshi orynda tur. Taldyqorǵandyqtar búgin 3:0 esebimen (25:16, 25:18, 25:13) «Aqtóbeni» tize búktirdi. Óskemenniń «Bereli» qorjynynda eshqandaı upaıy joq Pavlodardyń «Ertisin» utqan jaǵdaıda 14 upaımen ekinshi satyǵa kóteriledi.

Qaraǵandylyqtar sársenbi kúni «Jetisý», 14 qarashada «Qýanyshpen» (SQO) oınaıdy. N.Sadyqov shákirtteriniń sheberligi qanshalyqty ekendigi aldaǵy osy eki matchta belgili bolady. 

Eske sala keteıik, budan buryn voleıboldan Qazaqstan chempıonatynda «Jetisýdyń» «Qýanysh» komandasyn tize búktirgenin jazǵan edik.