Voleıboldan Qazaqstan chempıonatynda «Býrevestnık» pavlodarlyq komandany utty

PAVLODAR. KAZINFORM — Pavlodar qalasynda voleıboldan erlerdiń ulttyq lıga komandalary arasynda XXXIII Qazaqstan chempıonatynda alań ıeleri «Býrevestnıkpen» (Almaty) kezdesti.

Beısenbi kúni Sergeı Grıbov jattyqtyratyn «Pavlodar» el chempıony «Tarazdy» jeńgen edi.

Sol sekildi «Býrevestnık» (bas bapkeri Igor Nıkolchenko) osyǵan deıin kósh bastap kele jatqan «Jetisý» klýbyn toqtatqan bolatyn.

Bul joly almatylyqtar alǵashqy eki partııada 25:22, 25:20 esebimen basym tústi. Biraq alań ıeleri de qalyspady – 25:23, 32:30. Degenmen sheshýshi, besinshi sette «Býrevestnık» sátti oınady – 15:12. Qorytyndy esep – 3:2.

Osylaısha, almatylyqtar upaı sany (13) jaǵynan «Pavlodarmen» teńesip, ony besinshi orynǵa yǵystyrdy. Bul chempıonattyń aldaǵy oıyndarynyń da tartysty ótetinin ańǵartqandaı.

Senbi kúni «Jaıyq» - «Ushqyn-Kókshetaý», «Jetisý» - «Esil», «Taraz» - «Býrevestnık», «Pavlodar» - «Atyraý» komandalary ózara synǵa túsedi.

Eske sala keteıik, budan buryn voleıboldan el chempıonatynda «Jaıyq» klýbynyń alty ret qatarynan jeńiske jetkenin jazǵan bolatynbyz.