Voleıboldan Qazaqstan chempıonatynda alǵashqy bes komanda quıryq tistesip keledi

ASTANA. KAZINFORM – Pavlodar qalasynda áıelderdiń Ulttyq lıga komandalary arasynda HHHІІ Qazaqstan chempıonatynyń úshinshi týrynda alǵashqy bes klýb quıryq tistesip keledi.

Týrnır kestesinde 41 upaımen kósh bastaǵan «Qýanysh» (SQO) senbi kúngi oıyndarǵa qatysqan joq.

Osyǵan deıin qatarynan eki ret utylǵan óskemendik «Berel» Pavlodardyń «Ertisin» 3:1 (23:25, 25:14, 25:16, 25:22) esebimen tize búktirip, 40 upaımen «Qýanyshqa» jaqyndaı tústi.

Biraq soltústikqazaqstandyq klýbtyń bir oıyny kem.

«Almaty», «Jetisý» (Taldyqorǵan) jáne «Turan» (Túrkistan) komandalarynyń qorjynynda 37 upaıdan bar.

Almatylyqtar «Qaraǵandyny» 3:1 (15:25, 26:24, 25:21, 25:19) esebimen qapy qaldyrsa, taldyqorǵandyqtar Óskemenniń «Altaıyn» ońaı jeńdi – 3:0 (25:22, 25:8, 25:15).

Túrkistandyqtar «Aıqarakózden» (Taldyqorǵan) aılasyn asyrdy – 3:0 (25:17, 25:7, 25:11).

Altynshy oryndaǵy «Ertistiń» nebári 18 upaıy bar.

Jeksenbi kúni ortalyq match «Almaty» men «Qýanysh» arasynda ótedi.

Eske sala keteıik, budan buryn voleıboldan el chempıonatynda «Berel» klýbynyń qatarynan ekinshi ret jeńilip qalǵanyn jazǵan edik.