Voleıboldan Qazaqstan chempıonatynda «Aqtóbe» «Pavlodardy» utty

ATYRAÝ. KAZINFORM — Atyraý qalasynda voleıboldan erlerdiń ulttyq lıga komandalary arasynda HHHІІІ Qazaqstan chempıonatynyń birinshi týrynda «Aqtóbe» jáne «Pavlodar» ózara kezdesti.

Pavlodarlyqtar (bas bapkeri Sergeı Grıbov) kóktemde el birinshiligin kúmis júldemen qorytyndylasa, Sergeı Trıkoz jattyqtyratyn «Aqtóbe» jańa maýsymda Qazaqstan kýbogynda jeńimpaz atanǵan bolatyn.

Tájirıbeli voleıbolshylardan jasaqtalǵan «Aqtóbe» klýby sol kýboktaǵy qarqynyn jalǵastyryp, 3:0 (25:17, 25:17, 25:23) esebimen jeńiske jetti.

Budan keıin «Jaıyq» (Oral) men «Jetisý» (Taldyqorǵan) komandalary alańǵa shyqty. Bıylǵy el kýbogynda Vıktor Kozık baptaıtyn oraldyqtar kúmis, al Marat Adryshevtiń shákirtteri qola júldege qol jetkizgen edi.

Bul joly taldyqorǵandyqtar matchty qarqyndy bastady — 25:14. Sodan keıin eki set tartysty órbigenimen, «Jetisý» degenine jetti — jalpy esep — 3:0 (25:14, 25:23, 25:21).

Eske sala keteıik, budan buryn el chempıony «Tarazdyń» jańa birinshilikti jeńispen bastaǵanyn jazǵan bolatynbyz.